Kryeqytetasit

FC Prishtina kërcënon me protesta dhe bojkotim të garave nëse nuk bëhet Ligji

Bardhekaltrit paralajmërojnë se nëse nuk arrihet harmonizimi i Ligjit për Korporata, do të iniciojnë protesta dhe do të shkojnë deri tek vendimi më i vështirë i mundshëm – bojkotimi i garave

Klubi i futbollit FC Prishtina ka reaguar në mungesë të votimit të Ligjit për Korporata në Parlamentin e Republikës së Kosovës.

Bardhekaltrit vlerësojnë se është momenti i fundit që deputetët e Kuvendit të Kosovës t’i thërrasin mendjes dhe ditën e enjte të reflektojnë pozitivisht në miratimin e Ligjit për Korporata.

Prishtinasit kërcënojnë se do të tërhiqen nga garat nëse nuk votohet ky Ligj, i cili konsiderohet si shpëtim për sportin kosovar.

Më poshtë mund ta shihni postimin në Facebook të klubit më të madh kosovar të futbollit në Facebook.

“Nga viti 2016 kur është nisur ky debat, është e habitshme dhe e çuditshme se si është neglizhuar deri tani. Kërkojmë që ky Ligj për Korporata sa më shpejtë të harmonizohet me Ligjin për Sponsorizim që bihet ndesh apo kanë paqartësi ndërmjet vete. Ftojmë grupet parlamentare të gjejnë konsensusin e duhur dhe mos të barrikadohen mbrapa politikave ditore dhe mos të provojnë të gjejnë justifikime të cilat nuk qëndrojnë. Në rast se ndodh mosmiratimi i këtij harmonizimi të Ligjeve e të cilat janë jetike për sportin, kulturën dhe rininë, atëherë sportistët, klubet dhe sidomos njerëzit që e mbajnë sportin, nuk do t’ju mbetët tjetër përveç të iniciojmë në protesta masive të punëtorëve sportiv, sportistët, familjarë të sportistëve, tifozë dhe të gjithë sportdashësve në vend. Është momenti i fundit që ligjbërësit ta kuptojnë se miratimi i këtij harmonizimi do të thotë largim i fëmijëve nga rruga, profesionalizëm dhe investime të reja në sport. Të gjithë ata deputet që janë kundër, duhet të kenë parasysh që në kohët më të vështira, në paralelizmin nën okupim, sporti ka qëndruar duke zhvilluar gara në kushte më të vështira të mundshme e duke rezistuar e mos lëshuar vendin, siç ndoshta nuk ka ndodhur, fatkeqësisht, me shumë deputet. Duhet të dini se vetëm pas luftës dhe deri me tani vetëm në futbollin e Kosovës janë shpenzuar mbi 50 milion euro duke mos pasur asnjë lloj interesi për njerëzit të cilët kanë dhënë shuma të jashtëzakonshme duke e mbajtur futbollin, sportin e kulturën”, kanë shkruar prishtinasit.

Ndërkaq, rreth kësaj teme ka folur edhe kryetari i klubit prishtinas, Remzi Ejupi, i cili ka shpenzuar para të mëdha në futbollin kosovar.

“Unë nuk dua të besoj s’e ka deputetë që janë kundër sportit, besoj që nuk kanë pasur informata të mjaftueshme. Por, nëse ndodh që ka të tillë, atëherë Ju premtoj që edhe ne do të gjejmë rrugë për reagim të ashpër prej protestave masive në rrugë e deri në ndalimin e përcjelljes nëpër ndeshje të këtyre deputetëve. Pa financim nuk mund të mbahet sporti. Imagjinojeni sikur vëllezërit Xhaka apo Shaqiri të qëndronin në Kosovë, se a do të arrinin kaq larg sa kanë arritur nëpërmjet shteteve perëndimore ku me ligje adekuate është rregulluar mbajta e sportit. Shpresoj shumë që të enjten të harmonizohen këto ligje jetike e që për model ka shtetin gjerman me 30% nga tatimi në fitim, që të hapen mundësitë e investimeve të shumta, sidomos në infrastrukturën sportive, aty ku është baza apo çerdhja e edukimit profesional sportiv”, ka thënë kryetari Ejupi.