Futsall
FC Prishtina 01 pritet nga i pari i KOK-ut, Ismet Krasniqi
Presidenti i KOK-ut, Ismet Krasniqi, ka pritur sot ekspeditën e klubit tonë, FC Prishtina 01 si dhe komisarin e Ligës së Futsallit, Getart Hyseni, pas suksesit historik të arritur në garat ndërkombëtare.
FC Prishtina 01 është kualifikuar në mesin e 16 ekipeve më të mira të Ligës së Kampionëve, pas triumfit si e para në grupin kualifikues. Në fazën ‘Elite Round’, do të përballen me kampionët e Portugalisë, Benfica, Kairat Almaty të Kazakistanit dhe Doboveci i Sllovenisë.
Kampionët tanë kanë fituar të drejtën e organizimit të ndeshjeve të këtij grupi në Prishtinë, që nënkupton se në vendin tonë prej 29 nëntor deri më 3 dhjetor do të zhvillohet një tjetër ngjarje e madhe ndërkombëtare.
Presidenti Krasniqi ka përgëzuar ekipin për suksesin madhështor, duke thënë se futsallin tradicionalisht e kemi pasur në zemër dhe tani talenti ynë po shfaqet edhe në nivelet më të larta të këtij sporti.
Kryetari i klubit, Bledion Bryma, në emër të ekipit falënderoi presidentin Krasniqi për pritjen, derisa foli për rrugëtimin e klubit, si dhe sfidat deri tek arritja e këtij suksesi, duke u shprehur optimist se befasitë e këndshme nuk do të ndalen këtu.
Palët diskutuan edhe mundësinë e përfshirjes së sportit të futsallit në programin e Lojërave Mesdhetare Prishtina 2030, ide kjo që sipas presidentit Krasniqi është diskutuar edhe më herët, e që u mirëprit nga komisari Hyseni.
