Kryetari i Mitrovicës, Faton Peci, njëherësh njëri nga kryetarët e Guxo, është deklaruar lidhur me çështjen e presidentit, temë kjo shumë e përfolur pas zgjedhjeve të 28 dhjetorit dhe mundësisë për një tjetër proces zgjedhor në muajin mars.

Peci i prerë tha se nëse Kuvendi i Kosovës nuk arrin ta zgjedhë presidentin e shtetit më 4 mars, vendi do të shkojë në zgjedhje.

Kur u pyet nëse mund të quhet kërcënim kjo deklaratë e thënë edhe nga kolegët e tij të koalicionit, ai e kishte një përgjigje.

“Çështja e presidentit, ajo që dihet me saktësi, më 4 mars, në rast se Kuvendi i Kosovës nuk e zgjedh presidentin/presidenten, vendi shkon në zgjedhje me automatizëm. Ky nuk është kërcënim, veç po konstatoj në aspektin kushtetues dhe ligjor. Nuk është kërcënim. Kuvendi i Kosovës duhet me e zgjedh presidentin ma së largu më 4 mars. Në rast se më 5 mars, Kosova s’ka president të votuar në kuvend, me automatizëm, shkon në zgjedhje të jashtëzakonshme“, tha Peci në Klan Kosova.