Trajnerët
Emërimi i Egbos te Prishtina kambanë alarmi për trajnerët kosovarë – 60 për qind e Superligës me trajner të huaj
Me largimin e Debatik Currit dhe zyrtarizimin e nigerianit Emmanuel Egbo te Prishtina, trajnerët nga Kosova tashmë janë ‘pakicë’ në Albi Mall Superligën e Kosovës dhe kjo duhet të tingëllojë si një kambanë.
Dita e enjte solli ndryshime te shtabi teknik i Prishtinës, ku Curri u largua me marrëveshje të dyanshme dhe në vend të tij u emërua nigeriani Egbo.
Largimi i trajnerin llapjan nga klubi kryeqytetas ka kthyer në favor numrin e trajnerëve që vijnë jashtë Kosovës, shkruan Telegrafi.
Momentalisht në Albi Mall Superligën e Kosovës janë 60 për qind që vijnë nga jashtë Kosovës, dhe 40 për qind vendorë, shkruan Telegrafi.
Ilir Daja i Ballkanit vjen nga Shqipëria, Akis Vavalis i Dritës nga Greqia dhe Nedim Yigit i Lirisë nga Turqia janë tre nga trajnerët “jo-kosovarë”.
Xhingis Rexhepi i Feronikeli ’74 nga Maqedonia e Veriut dhe Gentjan Mezani i Gjilanit nga Shqipëria janë dy emrat tjerë së bashku me Egbon e Prishtinës nga Nigeria që çojnë në gjashtë numrin e trajnerëve të ‘huaj’ në Albi Mall Superligën e Kosovës.
40 për qindëshi i trajnerëve kosovarë nga Superligë përbëhet nga Tahir Batatina (Llapi), Armend Dallku (Dukagjini), Burim Shala (Fushë Kosova) dhe Qëndrim Kida (Malisheva).
Dy të parët duken si të sigurt në punën e tyre shkaku edhe i rezultateve, por dy tjerët mund të rrezikojnë gjatë sezonit ndonjë shkarkim apo largim, duke çuar kështu edhe më lartë numrin e të “huajve”.
Me pak fjalë, emërimi i Egbon te Prishtina duhet të jetë kambanë alarmi për trajnerët kosovarë, pasi ekipet e Superligën çdo ditë e më pak po u besojnë vendorëve.
