Drita bëhet me trajner të ri para Vitit të Ri, këto janë të rejat e fundit nga kampi gjilanas
Ndonëse ishte paralajmëruar se Drita do të bëhej me trajner të ri këtë mesjavë, një gjë e tillë duket se nuk do të ndodhë tani për tani.
Pas eliminimit nga Kupa e Kosovës, trajneri shkupjan Ardian Nuhiu ka dhënë dorëheqje për t’i dhënë fund aventurës së suksesshme në Gjilan.
Ditëve të fundit ka pasur shumë zëra për emrin e ri të tre-herë kampionit të Kosovës, megjithatë ende nuk ka pasur ndonjë zyrtarizim.
Më të afërt për këtë pozitë raportohen se janë Arsim Thaqi dhe Alban Dragusha.
Megjithatë, klubi i madh nga Gjilani duket se ende nuk ka vendosur për “timonierin” e ri të skuadrës.
Valon Zymberi, drejtor sportiv te Drita, në një prononcim për FrontOnline ka deklaruar se çështja e trajnerit të ri do të vendoset brenda pak ditësh.
“Jo, ende nuk kemi vendosur, bisedime ka pasur, besoj se brenda dy ditësh bëhet e ditur gjithçka. I qëndrojmë asaj se ’99 përqind’ do të kemi trajner vendor”, deklaroi Zymberi për portalin.
Nga ana tjetër, FrontOnline merr vesh se Thaqi është në “pole-position” për detyrën e trajnerit te Drita.
Burime të portalit bëjnë me dije se bisedime ka pasur, por ende nuk ka ndonjë marrëveshje.
Ndryshe, Drita e ka mbyllur stinorin vjeshtor në Superligën e Kosovës në vendin e parë me 38 pikë, aq sa ka edhe kampioni në fuqi, Ballkani.