2-3
Drilon Hazrollaj magjik me tre gola, Malisheva mposht Gjilanin me përmbysje
Malisheva ka marrë fitore të madh me rikthim ndaj Gjilanit 2-3 falë një paraqitje spektakolare nga Drilon Hazrollaj që realizoi tre gola.
Ndeshja nisi shumë mirë për skuadrën vendase, që pas nëntë minutave lojë kaluan në epërsi me golin e Jarovic.
Megjithatë epërsia e Gjilanit nuk zgjati më shumë se 10 minuta, kur Drilon Hazrollaj barazoi shifrat në 1-1 pas asistimit nga Arlind Veliu.
Malisheva fitoi penallti pesë minuta para fundit të pjesës së parë, kur Donaldo Ackaj luajti me dorë brenda zonës.
Drilon Hazrollaj ishte i saktë nga pika e bardhë për t’i dhënë epërsinë malishevasve 1-2.
Në pjesën e dytë Gjilani u hodh në sulm me të gjitha forcat dhe gjeti golin e barazimit 15 minuta para fundit të ndeshjes.
Kushtrim Shabani u gjet bukur në zonë dhe nga afërsia realizoi për 2-2.
Megjithatë katër minuta para fundit të ndeshjes, Drilon Hazrollaj doli sërish në skenë, duke shënuar për ta kompletuar het-trikun dhe për t’i dhënë tre pikë Malishevës.
Me këtë fitore Malisheva blindon pozitën e katërt me 41 pikë, dy më pak se Drita në vendin e tretë dhe shtatë më pak se lideri Ballkani.
Ndërkohë Gjilani mbetet në pozitën e tetë me vetëm 22 pikë pas 23 xhiroeve.
Ndeshjen e radhës Gjilani do ta ketë shumë të vështirë, pasi luan në udhëtim te Llapi, derisa Malisheva përballet sërish jashtë shtëpisë së saj, ku luan në Suharekë ndaj Ballkanit.
