Izraeli
Disa vende perëndimore i bëjnë thirrje Izraelit të respektojë ligjin ndërkombëtar në Gaza
Izraeli duhet të respektojë ligjin ndërkombëtar në Gaza dhe të adresojë krizën shkatërruese humanitare atje, i ka shkruar një grup i vendeve perëndimore në një letër drejtuar qeverisë izraelite të parë nga Reuters të premten.
Të gjitha vendet që i përkasin G7, përveç SHBA-së, nënshkruan letrën, së bashku me Australinë, Korenë e Jugut, Zelandën e Re, Holandën, Danimarkën, Suedinë dhe Finlandën.
Letra prej pesë faqesh vjen ndërsa forcat izraelite sulmojnë qytetin jugor të Gazës, Rafah, si pjesë e përpjekjes së saj për të zhdukur Hamasin, pavarësisht paralajmërimeve që kjo mund të rezultojë në viktima masive në një zonë ku civilët e zhvendosur kanë gjetur strehë.
“Në ushtrimin e të drejtës së tij për të mbrojtur veten, Izraeli duhet të respektojë plotësisht ligjin ndërkombëtar, duke përfshirë ligjin ndërkombëtar humanitar”, citon Reuters të ketë thënë letra. Letra gjithashtu përsërit “zemërimin” për sulmin e Hamasit të 7 tetorit.
Izraeli mohon bllokimin e ndihmave humanitare dhe thotë se duhet të eliminojë Hamasin për mbrojtjen e tij.
Sipas Reuters, vendet perëndimore thanë se ishin kundër “një operacioni ushtarak në shkallë të plotë në Rafah” dhe i bënë thirrje Izraelit që të lejojë që ndihma humanitare të arrijë tek popullata “nëpër të gjitha pikat përkatëse të kalimit, përfshirë atë në Rafah”.
“Sipas vlerësimeve të OKB-së, një ofensivë ushtarake e intensifikuar do të prekte afërsisht 1.4 milionë njerëz”, thuhej në letër, duke nënvizuar nevojën “për hapa specifikë, konkretë dhe të matshëm” për të rritur ndjeshëm rrjedhën e ndihmës, përcjell The Guardian, transmeton Express.
Reuters raporton se letra njeh përparimin e Izraelit në adresimin e një numri çështjesh, duke përfshirë lejimin e më shumë kamionëve ndihma në Rripin e Gazës, rihapjen e kalimit Erez në Gazën veriore dhe përdorimin e përkohshëm të portit Ashdod në Izraelin jugor.
Por ajo i bëri thirrje qeverisë së kryeministrit izraelit Benjamin Netanyahu të bëjë më shumë, duke përfshirë punën drejt një “armëpushimi të qëndrueshëm”, duke lehtësuar evakuimet e mëtejshme dhe rifillimin e “shërbimeve të energjisë elektrike, ujit dhe telekomunikacionit”.
