Deputeti Haxhiu i çon “selam” Kurtit: Pse nuk po u çon fli edhe mjekëve në QKUK, sa bënë sfilata
Deputeti i Partisë Demokratike e Kosovës, Bekim Haxhiu e ka kritikuar ish-kryeministrin Albin Kurti, ish-ministrin e Shëndetësisë, Arben Vitia dhe kryeministrin aktual Avdullah Hotin se nuk po i vizitojnë mjekët në QKUK.
Gjatë seancës së Kuvendit ku po diskutohet për situatën me pandeminë, Haxhiu ka ironizuar me një foto të kreut të LVV-së, Albin Kurtit dhe kandidatit për kryetar të Podujevës, Shpejtim Bulliqi duke ngrënë fli. Ai e ka pyetur Kurtin se pse nuk po u çon fli edhe mjekëve në QKUK.
“Prioritet i LDK-së dhe LVV-së që jemi sot këtu, nuk ka qenë pandemia, por ka qenë politika dhe pushteti, prandaj kemi do sfilata me flia dhe nuk kemi asnjë vizitë, as të Arben Vitisë e as të Albin Kurtit e as të Avdullah Hotit në QKUK me i pa dhe me i mbështet mjekët atje. Me ua çu kahpak fli edhe atyre atje që po bëjnë kujdestari edhe me ua dhënë rrogat të cilat i meritojnë”, ka thënë Haxhiu.
Ai ka ngritur edhe shqetësimin për numrin e testimeve brenda ditës, të cilin e konsideron të vogël, ndërsa shton se Kosova ka kapacitete që të testojë shumë më shumë qytetarë për COVID-19.
“Qytetarët po kërkojnë përgjigje nga dy qeveritë Hoti e Kurti, pse e kemi numrin më të vogël të testimeve në Evropë, përjashto Shqipërinë që ka një testim më të ulët?; Pse u dashtë 5 muaj që Kosova t’i bëjë më shumë se 500 teste?; Përse u dashtën më shumë se 8 muaj të kalojnë që Kosova t’i bëjë 1000 teste?; Prej fillimit ju kemi thënë që Kosova ka kapacitet”, ka thënë Haxhiu.
Ai ka propozuar testime grupore dhe familjare.
