Demanton BE-ja: Nuk ka propozime të reja për zgjidhjen e krizës në veri të Kosovës
Zëdhënësi i Bashkimit Evropian Peter Stano tha sot se nuk ka propozim të ri për zgjidhjen e krizës në veri të Kosovës, raporton Euronews.
Stano ka thënë për Euronews se informacioni për propozimin e ri të publikuar në media të caktuara është një tjetër dezinformim, për të cilin ka deklaruar se ka pasur shumë ditët e fundit.
“Në tryezë është propozimi për të cilin Përfaqësuesi i Lartë për Politikë të Jashtme dhe Siguri Josep Borell foli në konferencën për shtyp të hënën dhe diskutimet rreth tij janë duke vazhduar. Pra, nuk ka asgjë të re dhe ajo që ai tha të hënën është ende e rëndësishme,” tha Stano.
Media të caktuara, duke u thirrur në burime diplomatike, njoftuan sot se i dërguari special i BE-së për dialogun ndërmjet Beogradit dhe Prishtinës i ka dorëzuar kryenegociatorit të Kosovës, Besnik Bislimi, propozimin e ri për zgjidhjen e krizës në veri.
Borell tha të hënën pas takimit të ministrave të punëve të jashtme të BE-së në Bruksel se ai paraqiti një propozim për zgjidhjen e krizës aktuale, e cila është “në thelb e tij” dhe e të dërguarit special të BE-së për dialogun, Miroslav Lajçak.
Ai tha gjithashtu se propozimi mori mbështetjen e Berlinit dhe Parisit.
Ai ka thënë se serbët e Kosovës duhet të kthehen në institucionet e Kosovës dhe se Kosova duhet të tregojë fleksibilitet sa i përket targave dhe të punojë në marrëveshjen për formimin e Asociacionit të komunave me shumicë serbe pa vonesa.
Ai theksoi se 21 Nëntori nuk duhet të përmbushet pa marrëveshje “përndryshe do të jemi në prag të një situate shumë të rrezikshme”.
Sot u raportua se Bashkimi Evropian është në pritje të përgjigjes së Kosovës për një propozim lidhur me çështjen e targave serbe, që gjatë ditës së martë i dërguari i Posaçëm për dialogun, Miroslav Lajçak, ia ka prezantuar kryenegociatorit të Kosovës për dialog, Besnik Bislimi, gjatë takimit të tyre në Bruksel.
Kështu kanë thënë për Radion Evropa e Lirë burimet diplomatike në BE, por pa dhënë detaje për propozimin në fjalë.Burimet kanë konfirmuar se fjala është për propozimin për të zgjidhur urgjentisht çështjen e zbatimit të vendimit për ndërrimin e targave ilegale të Serbisë, në mënyrë që të shmangen tensionet në veri të Kosovës.
Kryenegociatori i Kosovës në dialogun me Serbinë, Besnik Bislimi, tha më 16 nëntor në Prishtinë se “ka elemente që i kemi diskutuar për mundësinë për dalje nga kriza, por nuk ka dakordim”.Ai theksoi se nuk e di se çka do të ndodhë më 21 nëntor, sepse “jemi në bisedime”.
