Chelsea me 10 lojtarë i nxjerr barazim Liverpoolit
Chelsea e ka arritur një pikë mjaft të rëndësishme në udhëtim ndaj Liverpoolit, në kuadër të javës së tretë në Premierligë.
“Blues” me 10 lojtarë arritën të barazojnë ndaj Liverpoolit në “Anfield”.
Ishte Kai Havertz që e kaloi ekipin e Tuchel në epërsi në minutën e 22-të të ndeshjes. Gjermani realizoi bukur me kokë.
Por, fundi i pjesës së parë ishte fatal për mysafirët. Pas një tollovie të krijuar në zonë, Reece James prek topin me dorë duke mos e lejuar të hynte në portë dhe ndëshkohet direkt me karton të kuq.
Ndërkohë, për Liverpoolin akordohet penallti të cilën në gol e shndërroi pa problem Salah.
Në pjesën e dytë Liverpooli sulmoi gjatë gjithë kohës, por nuk arriti assesi ta gjente rrugën e golit.
Kështu, pas tri xhirove, të dy ekipet kanë nga shtatë pikë dhe vendosen në pozitat dy dhe tre.
