Përfaqësuesja e Bullgarisë në futboll do të kërkojë fitore kundër Kosovës nesër në “Fadil Vokrri”, pavarësisht se në përballjen e parë të grupit pati një shfaqje të dobët me Malin e Zi duke luajtur baras si vendës 1:1.

Trajneri i Bullgarisë, Petar Hubchev, ka pranuar se Kosova është një kundërshtar shumë i vështirë, porse lojtarët e tij do të japin maksimumin në fushë.

“Na pret një lojë tejet e vështirë. Presim një kundërshtar të motivuar. Ata kanë lojtarë të mirë, të cilët kanë paraqitje të mira në Evropë, por nuk do të lejojmë që ndeshja të shkojë e gjitha në të mirë të tyre”, u shpreh Hubchev në një konferencë për media.

Edhe portieri i përfaqësueses së Bullgarisë Nikolaj Mihajlov, ndan të njëjtin mendim rreth ndeshjes së nesërme, dhe sipas tij do të jetë tejet vështirë të mposhtet një skuadër si Kosova duke e parë edhe mbështetjen e tifozëve, të cilën e ka. Ndeshja Kosovë-Bullgari zhvillohet nesër me fillim nga ora 20:45 në stadiumin “Fadil Vokrri”.