Kandidati për deputet nga Partia Demokratike e Kosovës (PDK), Bekim Haxhiu, ka bërë të ditur se ka dorëzuar ankesë në Gjykatën Supreme kundër vendimit të Panelit Zgjedhor për Ankesa dhe Parashtresa (PZAP), i cili kishte refuzuar kërkesën e tij për rinumërimin e votave preferenciale të PDK-së.

Sipas Haxhiut, vendimi i PZAP-it është marrë pavarësisht se raporti zyrtar i Komisionit Qendror të Zgjedhjeve (KQZ) kishte evidentuar “gabime masive” në procesin fillestar të numërimit në Qendrat e Numërimit dhe Rezultateve (QKN).

Gabime të konsiderueshme në rinumërim

Haxhiu ka theksuar se nga rinumërimi i 185 vendvotimeve në të gjitha 38 komunat e Kosovës janë konstatuar gabime të theksuara. Sipas tij, përqindja e gabimeve varion nga 6% në Mitrovicë deri në mbi 24% në Skenderaj dhe Malishevë.

Nga gjithsej 28,699 vota të rinumëruara, 2,831 prej tyre kanë rezultuar me gabime, që përbën rreth 9.86% të fletëvotimeve.

Sa i përket PDK-së, ai ka bërë të ditur se:

  • Janë evidentuar 557 vota me ndryshime, që përbëjnë 10.71% të votave të rinumëruara të kësaj partie.
  • 18 kandidatë të PDK-së kanë pasur ndryshime kumulative prej +4 deri në +10 vota, çka sipas tij dëshmon për gabime sistematike dhe jo të izoluara.

Gabime edhe te partitë tjera

Haxhiu ka theksuar se problemet në numërim nuk prekin vetëm PDK-në. Sipas raportit të KQZ-së:

  • Lëvizja Vetëvendosje (LVV): 1,066 vota të ndryshuara (10.7%)
  • PDK: 557 vota (10.7%)
  • Lidhja Demokratike e Kosovës (LDK): 563 vota (13.2%)
  • Aleanca për Ardhmërinë e Kosovës (AAK): 232 vota (11.1%)

Akuza ndaj KQZ-së për mungesë transparence

Haxhiu ka akuzuar KQZ-në se ka mbajtur “sekret” raportin e rinumërimit, duke e penguar atë që të paraqesë prova në kohë para PZAP-it.

Ai pretendon se kjo ka shkelur të drejtat e tij kushtetuese për një proces të rregullt dhe për mjet juridik efektiv, duke iu referuar neneve 31 dhe 32 të Kushtetutës.

Sipas tij, publikimi në kohë i raportit do të çonte në kërkesë për rinumërim të plotë për të gjitha subjektet politike.

Diferenca e ngushtë dhe kërkesa për rinumërim total

Haxhiu ka bërë të ditur se diferenca mes tij dhe kandidatit të renditur para tij është vetëm 102 vota. Ai ka theksuar se vetëm në mostrën e rinumëruar të votave të PDK-së, ndryshimi prej 557 votash është pesë herë më i madh se kjo diferencë.

Në këtë drejtim, ai ka kërkuar rinumërim të plotë të votave preferenciale të PDK-së në të gjitha vendvotimet që nuk janë përfshirë në mostrën fillestare, duke e cilësuar këtë si masën e vetme që garanton saktësinë e rezultatit.

Thirrje për transparencë

Në fund, Haxhiu ka theksuar se rezultati zgjedhor nuk mund të certifikohet me gabime të tilla dhe ka bërë thirrje që vullneti i qytetarëve të jetë përcaktues për përfaqësimin në Kuvend.

Ai ka njoftuar gjithashtu se të gjitha provat dhe dokumentet zyrtare i ka bashkangjitur në ankesën e dorëzuar në Gjykatën Supreme, ndërsa një pjesë të tyre i ka bërë publike në emër të transparencës.