Kryetari i Lëvizjes Vetëvendosje, Albin Kurti, ka akuzuar qeverisjen aktuale se sa herë që nis vala e protestave, ndërmerr veprime patriotike sikur ajo e shkarkimit të ministrit serb të Pushtetit Lokal, Ivan Teodosijeviq, ndërsa pati edhe disa porosi për kryeministrin Ramush Haradinaj.
Ai në një tubim me qytetarët në Prishtinë tregoi arsyet e shkarkimit me vonesë të ministrit të Listës Serbe për deklaratën e bërë më 24 mars për masakrën e Reçakut.
Kurti nuk ka hezituar të ironizojë me kryeministrin Haradinaj, duke e porositur që të bëhet ministër i sporteve të rënda për shkak të demarkacionit me Malin e Zi.
Sipas tij zgjidhja e vetme për të dalë nga gjendja aktuale është largimi i qeverisjes aktuale dhe shkuarje në zgjedhje të reja.
Edhe deputeti Glauk Konjufca nuk kurseu Qeverinë Haradinaj, duke thënë se buxheti i shtetit po konsiderohet si plaçkë e luftës, duke u dërguar firmave tenderë, të cilat ua kthejnë shpërblimin me përqindje, ndërkohë që sipas tij, burgjet e Kosovës janë mbushur me hajna të druve, derisa hajnat e shtetit po e zhvatin buxhetin.
Deputetja e Lëvizjes Vetëvendosje, Fitore Pacolli, tha se dëshmia më e mirë për luftën kundër krimit dhe korrupsionit para syve të Evropës do të ishte sikur pushtetarët aktualë të shkojnë në burg.
Ndërsa, kryetari i Qendrës së LVV-së në Prishtinë Arben Vitia tha se kapja e shtetit nga pushteti aktual ka kaluar në dimension të ri, duke degraduar çdo segment të jetës, përfshirë arsimin e shëndetësinë dhe sfera tjera, gjë e cila sipas tij po ndikon në mungesën e perspektivës për të rinjtë.
Ndryshe, Lëvizja Vetëvendosje tashmë ka nisur fushatën ‘Kundër PanHajnisë’ në të gjitha qytetet e Kosovës, duke mbajtur tubime me qytetarët për të diskutuar lidhur me temat që preokupojnë, si dhe gjetjen e zgjidhjes së këtyre problemeve.







