Maurizio Sarri mund të marrë frymë lirisht. Roman Abramoviç vendosi që ta konfirmojë atë në pankinën e Chelseat edhe pas humbjes 6-0 me Manchester City.
Sipas medias britanike, manjati rus i dha edhe një shans tjetër trajnerit italian, që së bashku me skuadrën e tij do të duhet të përballen me sfida të komplikuara në ditët në vazhdim.
“Blutë e Londrës” do të luajnë në Europa League me Malmon, ndërkohë që në FA Cup do të kenë përballë një skuadër si Manchester United. Këtu nuk duhet harruar pa përmendur as finalja e Kupës së Ligës, ku Chelsea do të jetë sërish përballë Manchester Cityt të Pep Guardiolës, sfidë që do të pasohet nga derbi londinez me Tottenhamin.
Me pak fjalë, shkurti do të jetë një muaj ferri për Maurizio Sarrin, që përveçse kalendarit të vështirë, ka edhe probleme të tjera për të zgjidhur: atë të futbollistëve të tij.
Ata që konsiderohen si senatorët e Chelseat e kanë vënë teknikun italian nën akuzë për shkak të nocioneve të tepërta taktike që, sipas tyre, vetëm shkaktojnë konfuzion te ta.
Kështu që Sarrit i duhet të rifitojë besimin e tyre për të shpëtuar pozicionin e tij dhe për të larguar hijen e Gianfranco Zolës, që në orët e fundit u fol se do të merrte vendin e bashkëkombësit të tij në pankinën e Bluve.







