4-vjeçari kafshohet në këmbë nga qentë endacak afër një çerdhe në Ulpianë, policia jep detajet
Një fëmijë 4-vjeçar në Prishtinë është kafshuar nga një qen endacak në institucionin parashkollor “Gëzimi ynë” në Ulpianë, duke i shkaktuar plagë në këmbë.
Policia e Kosovës është deklaruar për rastin e 4-vjeçarit, duke thënë se është përpiluar një raport për Operativë.
Zëdhënësja e Policisë, Flora Ahmeti, ka thënë se janë intervistuar prindi i fëmijës dhe zyrtarët e kopshtit.
Ajo tha se është përpiluar një raport për operativë, ndërsa pala ankuese të vazhdojë procedurën me padi civile.
“Me datën 17.10.2022 rreth orës 15:30 në Stacionin Policor Jugu, Prishtinë është raportuar se në një kopsht në Ulpianë , një fëmijë ishte sulmuar nga qentë endacak –kafshuar në këmbë. Lidhur me informatën janë intervistuar prindi i fëmijës si dhe zyrtarë të kopshtit. Në koordinim me prokurorin e shtetit është përpiluar një raport për Operativë, ndërsa pala ankuese të vazhdoj procedurën me padi civile”, tha Ahmeti.
Problemi me qentë endacakë është ngritur shpesh nga qytetarët, megjithatë ende s’ka zgjidhje konkrete nga komuna.
