15-vjetori i pavarësisë në veri, serbët nuk duan e shqiptarët s’mund të festojnë
Dita e Pavarësisë së Kosovës për serbët e veriut është një ditë e zakonshme, ndërsa shqiptarët në atë pjesë akoma nuk kanë mundësinë për të festuar lirshëm siç festohet gjithandej vendit. Edhe këtë 15-vjetor të shtetësisë së vendit, ata patën mundësinë që këtë ditë ta shënojnë vetëm në mënyrë individuale.
Emir Azemi, njohës i rrethanave politike, i cili banon në veri të Mitrovicës, tha se nuk ka besuar kurrë se edhe pas 15 viteve të shtetësisë, shqiptarët e asaj pjese nuk do të mund të festojnë lirshëm 17 shkurtin.
Sipas tij, banorët shqiptarë atje festojnë vetëm në mënyrë individuale, sepse institucionet e Kosovës akoma nuk kanë arritur ta shtrijnë sovranitetin e plotë në mbarë territorin e vendit.
“Nuk kam besuar atëherë, dhe as sot, se 15 vjet pas Kosovës shtet, ne ende nuk mundemi lirshëm ta gëzojmë këtë Pavarësi… Ne si qytetarë të Republikës së Kosovës në këtë territor, mund të festojmë vetëm në mënyrë individuale. Nuk ka organizime institucionale ose shtetërore në këtë pjesë, thjeshtë qytetarët janë duke vuajtur, sepse institucionet e Republikës së Kosovës në kuptimin e plotë të fjalës ende nuk kanë arritur ta shtrijnë sovranitetin dhe pushtetin 100 për qind edhe pse ne kemi këtu organet policore, gjyqësore, kushtimisht komunale dhe të tjera”, u shpreh Azemi.
Ai nuk është përgjigjur nëse serbët një ditë do ta festojnë Ditën e Pavarësisë së Kosovës, si dhe kur shqiptarët në veri do të festojnë lirshëm këtë festë sikurse bashkëkombësit e tyre gjithandej Kosovës.
Ndërsa shumica e qytetarëve serbë kanë thënë për KosovaPress se jo vetëm që nuk festojnë, por as që janë në dijeni për këtë festë dhe një gjë e tillë as që ju intereson.
Lubica, një qytetare nga veriu i Mitrovicës, thotë se serbët kanë ditën e tyre të pavarësisë të cilën e kanë festuar të mërkurën.
Ajo pretendon se Kosova është pjesë e Serbisë dhe ka shumë shtete që nuk e kanë njohur akoma.
“Jo nuk e di që është Dita e Pavarësisë, ne kemi ditën tonë të pavarësisë të cilën e kemi festuar… Duhet t’i pyesni shqiptarët nëse ata kanë festuar ditën e djeshme… sepse ne nuk e pranojmë pavarësinë… Kurrë (nuk do ta festojmë)…”, ka thënë Lubica.
Mirosllav Llaketiq, një qytetar tjetër nga veriu i Mitrovicës, nuk pajtohet me Pavarësinë e Kosovës, por ka pranuar shtetësinë e saj, vetëm pjesërisht.
Ai tha se serbët kërkojnë të drejta më të mëdha si konfederatë, apo edhe të drejtën për vetëvendosje.
“Jo, unë jam serb dhe nuk pajtohem me Pavarësinë e Kosovës… Në njëfarë mënyre po (Kosova është shtet), jo 100 për qind…”, theksoi Llaketiq.
Ditën e shtetit ku jeton nuk e feston këtë as serbja Natasha, për çka nuk jep ndonjë arsye të veçantë.
“Jo, jo, nuk e festoj, nuk e di pse, por thjeshtë jo. Nuk duam të bëhet ashtu siç duan të tjerët, dhe kjo është politikë… E mundur, por vërtetë në këtë pyetje nuk mund të përgjigjem (nëse serbët do ta festojnë një ditë këtë festë)”, tha ajo.
Kujtojmë që më 17 shkurt të vitit 2008 në orën 15:39 në Kuvendin e Republikës së Kosovës është shpall pavarësia e Kosovës. Shpallja e pavarësisë ishte bërë nga kryeministri i atëhershëm, Hashim Thaçi. /KP/
