Policia për tri javë 33 gjoba në autostradën ‘Arbër Xhaferi’
Policia e Kosovës, konkretisht Njësia për Kontroll të Autostradave, me qëllim të parandalimit të aksidenteve në autostradën ‘Arbër Xhaferi’, ka hartuar dhe ka zbatuar një plan operativ.
Disa pjesëmarrës në trafik, në autostradën ‘Arbër Xhaferi’, konkretisht në urën mbi lumin Lepenc, për kuriozitet dhe për shkak të bukurive që ofron kjo urë, ndalojnë me automjetet e tyre në shiritat emergjentë dhe zbresin nga automjetet ku në shumë raste bëjnë edhe fotografime të ndryshme e kjo është bërë edhe në grupe, me çka është rrezikuar siguria e tyre dhe e pjesëmarrësve të tjerë në trafik.
Policia me qëllim të shtimit të sigurisë në autostradë, gjatë tri javëve të shkuara ka shqiptuar gjithsejtë 33 tiketa në këtë lokacion: 28 tiketa ndaj shoferëve për ndalje në autostradë dhe 5 për lëvizjen e këmbësorëve në autostradë.
Policia e Kosovës kërkon nga qytetarët të respektojnë rregullat e trafikut rrugor, me theks të veçantë të mos bëjnë shkelje të rregullave të qarkullimit në autostradë, pasi rrezikojnë jetën e tyre dhe të tjerëve, duke paralajmëruar ndëshkime edhe në të ardhme.
