Sulmuesi i Baselit me prejardhje kosovare, Albian Ajeti, do ta vazhdojë karrierën e tij në Premierligë, pasi që sot u konfirmua se ka arritur marrëveshje me West Ham Unitedin. Ajeti ka nënshkruar kontratë katërvjeçare, me opsionin për ta zgjatur kontratën edhe për dy vjet të tjera.

Paraqitjet mbresëlënëse me Baselin gjatë sezonit të kaluar i kanë sjellë lajme të mira Ajetit.

Shuma për të cilën u transferua Ajeti besohet se është 7 ose 8 milionë funte, apo 7.5 deri në 8.6 milionë euro. Ai shihet si opsion i dytë fillimisht, mirëpo mund t’u bëjë konkurrencë edhe lojtarëve të rregullt në formacionin e parë.

Introducing our new striker… #WelcomeAjeti pic.twitter.com/h6T0fL1Tuu

— West Ham United (@WestHam) August 8, 2019

Ajeti e kishte nisur edhe sezonin e ri, 2019/20, në formë të mirë. Ai, me Baselin, deri më tani i ka zhvilluar tri ndeshje, në të cilat ka kontribuar me dy gola dhe dy asiste. Dy nga këto ndeshje ishin në kuadër të kualifikimeve për Ligën e Kampionëve, ndërsa njëra në kuadër të Super Ligës zvicerane.

Transfermarkt e vlerëson Ajetin me 7 milionë euro dhe vlera e tij vetëm ka vazhduar të rritet që kur u transferua nga St. Gallen në Basel, në tetor të vitit 2017, për 1.5 milionë euro.

Gjatë sezonit të kaluar, Ajeti i bëri gjithsej 43 paraqitje me Baselin në të gjitha garat, në të cilat kontribuoi me 21 gola dhe 11 asiste.

loading…