Policia italiane ka arrestuar një çift që strehonte bosin e Cosa Nostras, Matteo Messina Denaro. Bëhet fjalë për Emanuele Bonafede, 50 vjeç dhe Lorena Lanceri, 48 vjeçe.
Bashkëshortët akuzohen se kanë mbajtur në shtëpinë e tyre kreun e mafies siciliane, deri pak ditë para arrestimit të tij. Sipas prokurorisë, Bonafede dhe Lanceri kanë ndihmuar Messina Denaron të ruante kontakte me njerëzit e rëndësishëm.
Një prej tyre ishte Laura Bonafede, vajza e Nardo Bonafede, bosit mafioz të distriktit Campobello që vdiq në paraburgim në nëntor 2020.
.
Laura Bonafede është fotografuar në market së bashku me Matteo Messiba Denaro dy ditë para arrestimit të tij.
Në një letër që ajo i kishte dërguar, Laura flet me kode dhe i shpreh dashurinë kumbarit.
“E bukura e jetës sime ishte që të takova, sikur fati më bëri një dhuratë. Ajo dhuratë je ti. Mendoj se çdo femër që të ka pranë ndihet e veçantë. Me ty ndihem e mbrojtur, ti më bën të ndihem mirë, më bën të buzëqesh me batutat e tua dhe e adhuroj ironinë tënde, njohuritë dhe inteligjencën tënde të pamasë. Të të njihja ty ishte privilegj dhe më vjen keq për ata që nuk mundën. E di, të dua!”, shkruan ajo, me pseudonimin Diletta.
Ndërkaq, çifti ka dhënë dëshminë pas arrestimit të bosit të mafies më 16 janar, duke u shprehur se e kanë zbuluar rolin e tij dhe identitetin e vërtetë kur u bë me dije nga policia pasi nuk e njihnin. Sipas dëshmisë së rreme, Messina Denaro ishte prezantuar si Francesco Salsi.
Pas dy muajsh hetime u zbulua se bashkëshortët kanë gënjyer dhe kanë ndihmuar me vetëdije të plotë të shumëkërkuarin prej 30 vitesh. Kamerat e sigurisë kanë zbuluar se si “kumbari i fundit” ka shkuar në banesën e tyre gati çdo ditë, ndërsa çifti është kujdesur të kontrollojë rrugën në momentin që ai hynte. Të gjitha lëvizjet janë të regjistruara nga kamerat.







