Xhavit Haliti flet për herë të parë pasi dështoi të bëhet deputet: Më mundi PDK’ja

Anëtari i Kryesisë së Partisë Demokratike të Kosovës, Xhavit Haliti ka folur për herë të parë pasi nuk arriti të rifitojë mandatin e deputetit pas shumë vitesh.

Haliti ka komentuar për herë të parë mbetjen e tij jashtë parlamentit.

“Ka ndodhur diçka që ndoshta kam pasur nevojë të pushoj. Atë që e kisha konsideruar të domosdoshme është që në Kosovë sa më shpejt të ndryshojë sistemi zgjedhor dhe të përcaktohen rregullat e lojës për ata që garojnë”.

Ai thotë se në sistemin me lista të mbyllura të gjitha partitë kanë pasur përfaqësimin më të mirë në Kuvend por sipas tij sistemi i hapur mundëson një garë të tillë.

“Një bujk mund të fitojë në këtë sistem zgjedhor pasi bujqit mendojnë se ai mund të mbrojë interesat e tyre më mirë se dikush tjetër i përzgjedhur nga partia”, ka thene ai ne Dukagjini.

Haliti ka thënë se është mirë të mbyllen listat në mënyrë që të mos ketë përplasje mes kandidatëve të partisë së njëjtë.

Ish-deputeti thotë se ai garën nuk e ka humbur ndaj LDK-së apo Vetëvendosjes, por thotë se është mundur nga vet PDK.

Ish-nënkryetari i Kuvendit thotë se PDK është në opozitë dhe rotacioni në demokraci është i nevojshëm.

“Nuk mund të them se PDK nuk ka humbur. Ka pasur një gjueti shtrigash ndaj saj me vite të tëra. Të qenurit në opozitë do ta kthjellë PDK-në për luftën politike në të ardhmen”.

Haliti ka thënë se një pjesë e deputetëve të PDK-së janë të ri dhe nëse ka pasur lëshime në të ardhmen do të organizohet ndryshe kjo punë në raport me fjalimet në Kuvend.