Jack Wilshere ka thënë se nuk do t’i bashkohej West Hamit nëse Arsene Wenger do të vazhdonte në drejtimin e Arsenalit.
Wilshere kaloi te West Hami si transfer i lirë këtë verë, duke i dhënë fund qëndrimit 17 vjeçar te “The Gunners”.
Emërimi i Unay Emery si trajner i Arsenalit ia uli gjasat mesfushorit anglez teksa u bind se kishte ardhur momenti për t’u larguar.
“Nëse Arsene do të qëndronte, do të qëndroja edhe unë, për shkak të ndikimit që e ka pasur ai në karrierën time dhe për besimin që më ka ofruar. Wenger më dha shiritin e kapitenit dhe më respektonte shumë, por pastaj ai mori vendimin për t’u larguar dhe e vërejta se ishte koha për ndryshime”, zbuloi Wilshere.
Wilshere tregoi se Wenger i kishte thënë të mbetej te Arsenali dhe të luftonte për vendin e tij, por mesfushori që numëron 34 paraqitje me kombëtaren e Anglisë vendosi të largohej për shkak të ndryshimeve që kishin filluar të bëheshin te klubi londinez.
Jack Wilshere ka 4 paraqitje me West Hamin këtë sezon, e fundit me datë 1 shtator derisa 26 vjeçari vuan nga një lëndim në kyçin e këmbës.







