Presidenti i Serbisë, Aleksandar Vuçiq, ka deklaruar se ekziston mundësia që Marrëveshja e Ohrit të bëhet pjesë e kapitullit 35 të negociatave me Bashkimin Evropian dhe në këtë mënyrë kusht për anëtarësimin e Serbisë në BE.
Vuçiq ka thënë për të përjavshmen NIN, ndër të tjera, se u ka thënë qartë përfaqësuesve evropianë se çfarë mund dhe nuk mund të pranojë, duke shtuar se u ka thënë se “pranimi i Kosovës në OKB nuk bëhet fjalë”, transmeton Ballkani.info.
Për këtë informova francezët, gjermanët, italianët dhe të gjithë evropianët. Të gjithë dinë gjithçka – tha Vuçiq.
Ai shtoi se iniciativa për ta bërë Marrëveshjen e Ohrit pjesë e procesit të negociatave është shtyrë fuqishëm nga të dy vendet.
– Nuk më takon mua të them tani se cilat dy vende po e shtyjnë fort, nuk jam i sigurt nëse e duan edhe të tjerët, kështu që do të shohim – tha Vuçiq.
Marrëveshja e Ohrit është emri i planit evropian për normalizimin e marrëdhënieve, i cili u ra dakord në mars në Maqedoninë e Veriut pas takimit të shkurtit ndërmjet Beogradit dhe Prishtinës në Bruksel.







