VIDEO/ Ndodh çmenduria, portieri shënon gol, fal tij Liverpoolit i mbesin gjallë shpresat për Champions
Portieri Alisson Becker me një gol në sekondat e fundit të kohës shtesë ia siguroi Liverpoolit fitoren 2:1 kundër West Bromit, duke ia mbajtur gjallë shpresat skuadrës së Jurgen Kloppit për top katërshe në Premierligë.
Liverpooli po barazonte 1:1 me West Bromin pas golave nga Hal Robson-Kanu dhe Mohamed Salah, para se portieri brazilian të shënonte me kokë nga një korner në minutën e 94-të në The Hawthorns.
Kjo fitore nënkupton se Liverpooli tani i është afruar në vetëm një pikë vendit të katërt, Chelsea, dy ndeshje deri në përfundim të sezonit.
ALISSON, DE CABEÇA, MARCA O GOL DA VITÓRIA DO LIVERPOOL NO ÚLTIMO MINUTO!!!!! INACREDITÁVEL!!! pic.twitter.com/xNtaA1sxTZ
— Esportes280 (@esportes280) May 16, 2021
Të kuqtë do t’i kenë dy ndeshje për ta siguruar një vend në top katërshe të Premierligë, në përpjekje për t’u kualifikuar në Ligën e Kampionëve, pas një sezoni dëshpërues pa trofe.
Leicester City, që renditet i treti me 66 pikë, tri më shumë se Liverpooli, do të përballet me Chelsean javën e ardhshme.
Përkundër mbizotërimit të hershëm, Liverpooli pësoi pas një çerek ore lojë, kur Robson-Kanu i iku mbrojtjes dhe shënoi për epërsinë e vendasve.
Salah e barazoi rezultatin pas rreth gjysmë ore lojë, kur e la të shtangur portierin me një goditje mjeshtërore nga largësia.
Liverpooli e shtoi edhe më shumë presionin ndaj West Bromit në pjesën e dytë, me Xherdan Shaqirin që u fut në lojë nga Klopp në minutën e 59-të.
Por të kuqve iu nevojit ndihma e portierit në sulm për t’i siguruar tri pikët e plota. Alisson e braktisi portën në aksionin e fundit në ndeshje dhe shkoi në zonën e West Bromit për rivënien e fundit nga këndi.
Braziliani shënoi gol fantastik me kokë për ta mbajtur skuadrën e tij në lojë për top katërshe, synimin kryesor të saj këtë sezon.