Turqi
Vdes deputeti turk që pësoi atak në zemër teksa po fliste në foltoren e Kuvendit
Parlamentari turk, Hakan Bitmez, vdiq sot, dy ditë pasi pësoi një atak në zemër dhe u rrëzua teksa përfundonte një fjalim ku kritikonte politikën e qeverisë ndaj Izraelit.
Bitmez, 54 vjeç, një deputet nga partia opozitare Saadet, vdiq në një spital të qytetit në Ankara, u tha gazetarëve Ministri i Shëndetësisë Fahrettin Koca në deklaratat televizive.
Bitmez ishte kryetar i Qendrës Kërkimore të Unionit Islamik dhe më parë ka punuar për OJQ-të islamike. Ai ishte i martuar dhe baba i një fëmije.
Ai u rrëzua përtokë pasi qëndroi në foltore përpara asamblesë së përgjithshme të së martës. Ai kritikoi Partinë AK (AKP) në pushtet të Presidentit Tajip Erdogan për tregtinë e Turqisë me Izraelin pavarësisht luftës në Gaza.
“Ju lejoni që anijet të shkojnë në Izrael dhe paturpësisht e quani atë tregti. Ju jeni bashkëpunëtor i Izraelit,” tha Bitmez në fjalimin e tij.
Pasi mbaroi fjalimin e tij, Bitmez papritmas ra në dysheme, ndërsa përfaqësuesit e tjerë nxituan nga vendet e tyre për të ndihmuar.
Koca tha më pas se një angiogram zbuloi se dy venat kryesore në zemrën e tij ishin bllokuar plotësisht.
“Zemra e tij pushoi së rrahuri, më pas u reanimua në parlament dhe brenda 20 minutash u transferua në spital ku makineritë e mbajtën në jetë”, tha ministri Koca.
