Muhamed Kuka

Ushtari i UÇK-së që kishte ardhur nga Amerika, tash i njohur për publikun: Millosheviq, kam me ta ça kokën! VIDEO

Muhamed Kuka, është një ish-ushtar i UÇK-së, dhe është fytyra më e njohur që nga mbarimi i luftës, tash e 21 vjet që asnjëherë nuk mungon në tubimet që lidhen me luftën. Në çdo përvjetor Kuka qëndron i pari, duke valëvitur flamurin kuqezi dhe duke i prirë masës.

Kuka është nga qyteti i Ferizajt dhe ka jetuar në Shtetet e Bashkuara të Amerikës kur në Kosovë nisi lufta, dhe pa hezituar fare iu bashkua Ushtrisë Çlirimtare të Kosovës, duke mos u ndarë kurrë më emocionalisht me të.

Rrobat e ushtrisë të Muhamed Kukës nuk vjetrohen kurrë për të. Në çdo përvjetor të ndonjë dëshmori, në protestat për të mbrojtur luftën e pastër të UÇK-së ai i vesh përsëri ato dhe me flamurin në dorë niset për Prishtinë, dhe në secili qytet të Republikës së Kosovës.

Kuka ka qenë pjesë e batalionit ‘Atlantiku’, dhe në shenjë nderimi dhe mirënjohje nuk lë cep të Kosovës pa shkelur, e krejt këtë e bën për t’i nderuar dëshmorët dhe familjet e tyre.

Ballkani.info ka hasur në një video ku Kuka bashkë më shokët e tij kishte ardhur nga Amerika për të luftuar në Kosovë. Ai shihet në Durrës, pak para nisjes për në vijat e frontit.

Në këtë video, Kuka dëgjohet duke i dërguar mesazh Millosheviqit: Pasha din e iman, kam me ta ça kokën.

Shihni videon nga minua 1:00…

Kuka, sot veterani ka 70 vjet dhe ka qëndruar 24 vjet në Amerikë, para se të kthehet në Kosovë, dhe arsyeja pse është kthyer ai thotë se është masakra e Reçakut, të cilën e ka parë në lajme në televizionet në Amerikë, dhe pas saj menjëherë është nisur për Kosovë.

Kuka, aktualisht jeton në Ferizaj, dhe fatkeqësisht nuk gëzon një jetë të mirë ekonomike, dhe nuk merr përkrahje nga shteti. Ai disa herë ka kërkuar ndihmë për vajzën e tij me probleme shëndetësore.

Ndërsa, kujtojmë që Kuka është një njeri shumë i dashur dhe i respektuar në qytetin e tij në Ferizaj, ku s’ka qytetar atje që nuk e nderon dhe ndan respekt të veçantë ndaj tij.