U godit me thikë në gjoks, Prokuroria jep detaje për vrasjen e 15-vjeçarit në Prizren

Prokuroria Themelore e Prizrenit ka dhënë detaje lidhur me vrasjen e 15-vjeçarit në Prizren.

Përmes një komunikate drejtuar mediave, Prokuroria ka bërë me dije se në bazë të informacioneve, njëri nga sulmuesit e kishte goditur viktimën me mjet të prehtë përkatësisht me thikë në pjesën e majtë të gjoksit, e cila ka rezultuar me pasoja fatale për viktimën.

“Nga informacionet fillestare rezulton se në rastin konkret të miturit e përfshirë në përleshje kanë poseduar një armë zjarri dhe dy thika. Momentalisht, prokurori kujdestar së bashku me policinë janë duke bërë hetime, për të zbuluar motivet e ngjarjes dhe për ta zbardhur rastin në tërësi”, thuhet në komunikatë.

Prokuroria ka njoftuar se ka kërkuar nga Gjykata që ndaj të miturit që ka shkaktuar vrasjen të caktohet masa e paraburgimit, ndërsa dy të miturit e tjerë, që kanë marrë pjesë në përleshje, janë liruar në procedurë të rregullt.