Trajneri i TNS shpreson në kualifikim përballë Feronikelit, i pëlqen stadiumi ‘Fadil Vokrri’

Skuadra e The New Saints ka arritur gjatë ditës së sotme në Kosovë, ku do ta zhvillojë ndeshjen e kthimit në kuadër të rrethit të parë eliminator të Ligës së Kampionëve kundër Feronikelit.

Në pasditën e sotme, djelmoshat e Scott Ruscoe zbritën në stadiumin “Fadil Vokrri” në kryeqytet, derisa trajneri u paraqit para gazetarëve në një konferencë për shtyp.

Ndeshja e parë në Uells përfundoi me rezultat 2:2, ndërkaq me këtë rezultat Feronikeli i Zekirija Ramadanit është në avantazh të plotë, gjë për të cilën është i vetëdijshëm edhe vetë trajneri i TNS, Ruscoe.

Në mes të tjerash, ai tha se me pak fat, skuadra e tij do të mundohet ta bëjë më të mirën nesër.

“Në ndeshjen e parë morëm një rezultat zhgënjyes, por tani me pak fat do të mundohemi t’i vëmë gjërat në vendin e duhur në ndeshjen e nesërme”, tha fillimisht Ruscoe.

“Nëse luajmë sikurse në pjesën e parë, do të jetë e mirë, në të kundërtën do të jetë e vështirë”, vlerësoi trajneri i TNS.

“Gjendja e fushës është shumë e mirë. Stadiumi është shumë i këndshëm, dhe mezi pres për ndeshjen dhe shpresoj që të fitojmë”, pohoi ai.

“Kemi shumë opsione në formacion dhe do të mundohemi t’i zgjedhim sa më mirë problemet”, shtoi Ruscoe.

Ndryshe, ndeshja e nesërme zhvillohet me fillim nga ora 20:45.

loading…