Futbollistët e Legia Varshavës janë sulmuar nga tifozët, të cilët janë futur me dhunë në autobusin e ekipit, ka njoftuar të hënën ekipi nga Polonia.

Futbollistët e Legias po ktheheshin në bazën stërvitore të hënën, një ditë pas humbjes nga Wisla Plocku (1:0) kur u sulmuan.

“Autobusi me lojtarët po kthehej në qendrën stërvitore nën shoqërimin e policisë”, tha Legia. “Pavarësisht këtyre masave, autobusi u ndalua për një kohë të shkurtër dhe më pas një numër njerëzish hynë në të dhe u sollën me agresion ndaj lojtarëve”.

Legia nuk tha nëse ka ndonjë të lënduar, por shtoi se policia e shpërndau grupin e tifozëve të irrituar me rezultatet.

“Klubi po e trajton incidentin shumë seriozisht dhe po merr hapa për ta sqaruar plotësisht atë”, tha Legia, duke shtuar se po rrit sigurinë në ambientet e saj.

Më herët, portali sportiv “Online Interia” raportoi se futbollistët Rafael Lopes, Luquinhas dhe Mahir Emreli janë rrahur në këtë sulm. Policia e Varshavës shkroi në “Twitter” se një grup njerëzish bllokuan autobusin e ekipit të hynte në qendrën stërvitore në Ksiazenice, por ata u shpërndanë kur mbërritën autoritetet.

Kampionia në fuqi e Polonisë, aktualisht është në pozitën e fundit në tabelë. Pjesë e këtij ekipi është edhe reprezentuesi i Kosovës, Lirim Kastrati.