Tahiri për të kthyerit nga Siria: Kriminelët do të dalin para drejtësisë, viktimat do të rehabilitohen

Ministri i Drejtësisë, Abelard Tahiri, ka thënë se shteti e ka për obligim që t’i rehabilitojë fëmijët, por edhe gratë që janë kthyer pas tmerrit që kanë përjetuar atje.

“Në anën tjetër nuk duhet të lejojmë që qytetarët tanë të kthehen në kërcënim për demokracinë në botë dhe të kryejnë sulme të mundshme terroriste”, ka thënë Tahiri në Klan Kosova.

“Një pjesë e tyre kanë qenë të manipuluara, për atë arsye kemi edhe një proces hetimor, secili që dyshohet se ka qenë pjesë e këtyre organizatave do të dalin para drejtësisë – askush nuk do të amnistohet”.

“Kriminelet do të dalin para drejtësisë, viktimat do të rehabilitohen”.

Tahiri ka thënë se Kosova ka dhënë shembull shumë të mirë në botë me kthimin e 110 shtetasve nga Siria.

“Janë nëntë fëmijë pa asnjërin prind, janë fëmijë jetimë edhe babain edhe nënën i kanë të vrarë në luftë. Ne kemi programet për trajtimin e tyre. Disa nga ata u janë dorëzuar familjeve të prindërve, por ne i kemi në përkujdesje të vazhdueshme dhe do të sigurojmë gjithçka që atyre u nevojitet”.

“Shteti do t’u ofrojë rehabilitim edhe të gjitha grave që nuk kanë mbështetje”.

Ministri i Drejtësisë tha se shteti nuk do t’i lë në dorë asgjë rastësisë, duke hetuar dhe mbledhur kështu informacione për secilin individë të është kthyer nga Siria – në mënyrë që ata të mos paraqesin rrezik për Kosovën dhe asnjë shtet tjetër.

“Ne kemi informatat të detajuara edhe për personat që gjenden në Siri, nuk e dimë saktësisht numrin e tyre, por tashti nuk preferojmë që të bëjmë publike vendndodhjen e tyre, moshën apo gjininë në mënyrë që të mos i rrezikojmë ata”.