Rishi Sunak
Sunak: Perëndimi duhet të jetë më i guximshëm në sekuestrimin e aseteve ruse
Vendet perëndimore duhet të jenë më të guximshme në sekuestrimin e aseteve ruse të ngrira pas fillimit të pushtimit rus të Ukrainës në vitin 2022, tha kryeministri britanik Rishi Sunak.
Në një artikull të gazetës Sunday Times, me rastin e plotësimit të dy viteve nga fillimi i luftës, kryeministri britanik thekson se Ukraina ka nevojë për më shumë armë me rreze të gjatë, dronë, municione, si dhe ndihmë të tjera.
“Ne duhet të tregohemi më të guximshëm në lidhje me sekuestrimin e qindra miliardave në asetet e ngrira ruse”, thotë Sunak në artikull.
Muajin e kaluar, ministri britanik i investimeve, Dominic Johnson diskutoi këtë çështje me Sekretarin e Thesarit të SHBA, Wally Antegemo, duke theksuar se gjithçka duhet bërë në përputhje me ligjin ndërkombëtar.
Në vitin 2022, Bashkimi Evropian, SHBA, Japonia dhe Kanadaja ngrinë aktivet e bankës qendrore ruse me vlerë rreth 300 miliardë dollarë.
G7 po shqyrton sekuestrimin e aseteve ruse për ta bërë Moskën të paguajë për dëmin që ka shkaktuar me pushtimin e saj ushtarak të Ukrainës, transmeton OraNews.
Kryeministri britanik i kërkoi gjithashtu SHBA-së që të vazhdojë të ofrojë mbështetje financiare dhe ushtarake për Ukrainën.
“Ne kurrë nuk duhet të nënvlerësojmë atë që Amerika ka bërë për Ukrainën dhe për sigurinë euroatlantike. Unë i bëj thirrje që të vazhdojnë mbështetjen e tyre dhe jam i sigurt se do ta bëjnë”, thekson Sunak.
VIDEO BONUS: Limaj fton të rinjtë mos t’ia kthejnë shpinën atdheut: Kosova sot në anarki, bashkohuni me neve
