Stuhia godet plazhet e jugut: Dy të mbytur në Himarë, dyshohet për një të tretë

Dy persona raportohet të kenë humbur jetën, ndërsa dyshohet edhe për një të tretë, për shkak të motit të keq në Himarë. Autoritetet raportojnë për dy të konfirmuar të mbytur, një burrë dhe të birin, ndërsa gruaja e tij nuk është gjetur akoma nga skuadra e shpëtimit dhe dyshohet se është gjithashtu e mbytur. Ata janë dërguar drejt spitalit të Vlorës në gjendje të rëndë por nuk kanë mbijetuar.

Era e fortë dhe reshjet e shiut kanë krijuar një situatë të vështirë në qytetin e Himarës. Pushuesit e shumtë kanë boshatisur plazhet, pasi era e fortë me shpejtësi deri në 80 kilometra në orë, shoqëruar me reshje, ka shkulur edhe çadrat e plazheve. Siç duket edhe nga pamjet, edhe deti është mjaft i dallgëzuar. Kapitaneria e Vlorës ka njoftuar bllokimin e daljes në det të mjeteve të vogla lundruese, përcjell A2.

Ndërkohë, reshjet e shiut kanë prekur thuajse të gjithë vijën bregdetare të vendit. Durrësi, Vlora, Shëngjini dhe Velipoja gjithashtu janë zgjuar nën pushtetin e shiut. Ndërkohë reshjet kanë prekur edhe zonën e Kukësit, kanë krijuar probleme kryesisht në qarkullimin e mjeteve. Situata me reshje ka ndihmuar veçanërisht zonat ku prej disa ditësh ishin aktive vatrat e zjarreve, duke i shuar ato.