Tre shtetasit e Shqipërisë, në mesin e tyre një oficer i Policisë së Shqipërisë, të cilët u kapën me një milion euro kesh në Merdarë muajin e kaluar, do të shkojnë në paraburgim.

Vendimin e ka nxjerrë të mërkurën një trup gjykues i Departamentit Special të Gjykatës së Apelit, raporton Paparaci.

Apeli e ka ndryshuar aktvendimin e Gjykatës Themelore në Prishtinë, i cili i la të lirë tre të dyshuarit Aurel Kaziu, Ardit Laska dhe Edmir Ahmagjokaj. Të tre janë shtetas të Shqipërisë dhe po hetohen penalisht për shpëlarje të parave.

Aurel Kaziu, oficer i Policisë së Shtetit të Shqipërisë, i pezulluar nga detyra pas kapjes me 1 milion euro në Merdarë

Saga me masën e sigurisë ndaj të dyshuarve kishte nisur që më 27 shkurt, tri ditë para se furgoni me një milion euro kesh të padeklaruara ishte kapur duke hyrë në Kosovë në pikëkalimin kufitar të Merdarës.

Gjykata Themelore ia kishte refuzuar Prokurorisë Speciale kërkesën për caktimin e masës së paraburgimit ndaj të dyshuarve me arsyen se prokurorja Shenaj Berisha, në kërkesën e saj, nuk kishte prezantuar prova që mbështesnin bazën e dyshimit.

Aktvendimi i Gjykatës së Apelit/ Data: 18.03.2026
Aktvendimi i Gjykatës së Apelit/ Data: 18.03.2026

Gjykata e Apelit e kishte kthyer lëndën, por në rivendosje Themelorja sërish e kishte refuzuar kërkesën e Prokurorisë Speciale duke i lënë të lirë tre të dyshuarit.

Prokuroria Speciale përfaqësohet në këtë rast nga prokurorja Shenaj Berisha. Ndërsa gjyqtar në procedurën paraprake është gjyqtari i Departamentit Speciale, Leon Përlaska.

Kryetare e Kolegjit në Gjykatën e Apelit, që vendosi për ndryshimin e aktgjykimit të shkallës së parë, është gjyqtarja Afërdita Bytyçi.

Aurel Kaziu, Ardit Laskaj dhe Ardit Ahmaxhokaj ishin arrestuar nga policët kufitarë më 24 shkurt pasi doganierët në pikëkalimin kufitarë të Merdarës i kishin gjetur një milion euro kesh të padeklaruara në një furgon me të cilin po udhëtonin ata.

Tre të dyshuarit ishin ndaluar me urdhër të prokurores Shenaj Berisha.

Sipas përshkrimit të Prokurorisë Speciale në dosjen e rastit, një milion euro kesh ishin vendosur në një “bunker të improvizuar” brenda furgonit.