Rektori i Universitetit të Prishtinës “Hasan Prishtina”, Naser Sahiti, që nga tetori e ka emëruar si ushtrues detyre sekretarin e këtij universiteti, Esat Kelmendi, pa e njoftuar zyrtarisht Këshillin Drejtues të UP-së.

Kelmendit i kishte skaduar mandati më 25 tetor dhe rektori në mënyrë që kjo pozitë të mos mbetet vakanate e emëroi si U.D. Esat Kelmendin.

“Me qëllim që kjo pozitë të mos mbetet vakante dhe të sigurohet mbarëvajtja, udhëheqja e funksionaliteti në të gjitha nivelet e institucionit dhe duke marrë parasysh kompetencat e rektorit sipas nenit 25, paragrafi 1 dhe neni 28 të statutit, si dhe bazuar në vendimin e njëjtë të Rektorit të mëparshëm për situatë të njëjtë, Rektori ka emëruar z. Kelmendin u.d. të sekretarit të përgjithshëm”, kanë bërë të ditur për KALLXO.com nga ana e zyrës së Rektorit.

Të pyetur nëse e kanë njoftuar paraprakisht Këshillin Drejtues të UP-së si organ mbikëqyrës i Universitetit, nga Rektorati thonë se i kanë njoftuar “në  mënyrë jo-formale”.

“Lidhur me përfundimin e kontratës të sekretarit të përgjithshëm, z. Esat Kelmendi, janë njoftuar individualisht disa anëtarë të KD-së, në takime jo-formale”, thuhet më tej në përgjigje.

Rektori Sahiti megjithatë është duke tentuar që përsëri ta emërojë Kelmendin si Sekretar të Përgjithshëm, duke u thirrur në vendimet paraprake të ish-rektorit Marjan Dema dhe disa opinione ligjore që ai i kishte kërkuar.

Sipas tij, me dispozitat e Statutit të Universitetit të Prishtinës “Hasan Prishtina” nuk parashihet kohëzgjatje apo kufizim i emërimit të sekretarit të përgjithshëm.

“Megjithatë, në vitin 2018 ish-rektori, prof. dr. Marjan Dema, i është drejtuar institucioneve kompetente me kërkesë respektive për opinion ligjor lidhur me çështjen e vazhdimit të kontratës të sekretarit të përgjithshëm, z. Kelmendit. Opinioni ligjor i institucioneve kompetente ka qenë që vazhdimi i kontratës t’i bëhet në bazë të përformances për një periudhë pesë vjeçare, pa pasur nevojë për konkurs publik, mirëpo Këshilli Drejtues i UP-së megjithatë kishte vendosur t’i vazhdoj kontratën për 3 vite, e cila ka skaduar më 25 tetor 2021”, thuhet në përgjigjen e Rektoratit.

Sipas Sahitit, Kelmendi është zgjedhur sekretar i përgjithshëm i UP-së sipas rregullave të konkursit publik bazuar në Statutin e UP-së dhe sipas tij, statuti i UP-së nuk parasheh dispozita me të cilat kufizohet kohëzgjatja e emërimit të sekretarit të përgjithshëm.

Por, ka bërë të ditur se kanë dërguar kërkesë për interpretim ligjor në lidhje me vazhdimin e mandatit të tij.

“Në anën tjetër, KD i mëparshëm i kishte vazhduar kontratën për 3 vite. Për këtë arsye në fillim të tetorit 2021, Rektori ka dërguar kërkesë me shkrim për opinion ligjor lidhur me çështjen e vazhdimit të kontratës të sekretarit të përgjithshëm dhe jemi në pritje të përgjigjes përkatëse”, thonë nga rektorati më tej për KALLXO.com.

Në anën tjetër, në statutin e UP-së, neni 25 tek detyrat e rektorit nuk përcaktohet se ai ka të drejtë që të emëroj si U.D. sekretarin.

“Rektori është autoriteti kryesor menaxhues i Universitetit. Rektori është përgjegjës për punën efektive dhe të rregullt të Universitetit dhe për menaxhimin e tij sipas politikës së përcaktuar nga Këshilli drejtues, dhe ka gjithë autoritetin e nevojshëm për ushtrimin e këtyre detyrave. Detyrat e rektorit specifikohen në kontratën e punës”, thuhet në statut.

Po ashtu në këtë statut specifikohet se për pozitën e Sekretarit të Përgjithshsm duhet të hapet konkurs publik dhe ai zgjidhet nga Këshilli Drejtues, sipas nenit 39.

“Sekretari i Universitetit zgjidhet nga Këshilli drejtues sipas propozimit të rektorit, të bazuar në raportin e komisionit profesional të zgjedhur nga rektori, në bazë të konkursit publik”, thuhet në këtë nen.

KALLXO.com përmes burimeve në Këshillin Drejtues ka kuptuar se në mbledhjen e kaluar që është mbajtur të premten, e për të cilën nuk kishte njoftim publik, është diskutuar emërimi i Kelmendit si sekretar në bazë të opinionit ligjor të ish-rektorit Marjan Dema.

Por, në këtë mbledhje KD ka vendosur që deri në pranimin e interpretimit ligjor nga MAP, Kelmendi të mos marrë asnjë vendim.

Po ashtu,  sipas burimeve, mbledhja do të vazhdojë sot dhe pritet që ta pranojnë interpretimin ligjor.

Ballkani.info kishte raportuar edhe më herët në lidhje me këtë temë.