Simiq: Nuk ka kohë më të mirë se tani, që Bërnabiq të vizitojë Kosovën
Nënkryetari i Listës Serbe, Igor Simiq, ka thënë se nuk ka kohë më të mirë për vizitën e kryeministres serbe, Ana Bërnabiq, në Kosovë, sesa nesër. Sipas tij, në këtë mënyrë, qytetarëve po u dërgohet mesazhi se nuk harrohen dhe se shteti i Serbisë vazhdon t’u ofrojë atyre mbështetje të plotë.
Simiq tha se vizita e çdo zyrtari të Serbisë do të thotë paqe për qytetarët dhe se ardhja e kryeministres është e rëndësishme para së gjithash për shkak të numrit të madh të projekteve që, siç thotë ai, nënkuptojnë jetë për serbët në Kosovë dhe realizohen falë udhëheqësve serbë, Aleksandar Vuçiq dhe kryeministres Bërnabiq.
“Serbët në Kosovë presin që vizita të shkojë mirë. Përfaqësuesit politikë të serbëve do të insistojnë në bisedimet me kryeministren që të vazhdojnë investimet në projekte, për të vazhduar luftën për të drejtat dhe interesat e popullit serb në dialogun me Prishtinën.
“Ne do të dërgojmë një mesazh të qartë se besojmë vetëm në shtetin e Serbisë, se është vetëm vendi ynë, se besojmë në presidentin Vuçiq, udhëheqjen tonë shtetërore dhe do të kërkojmë që investimet në komunat, fshatrat serbe, të vazhdojnë me me të njëjtin intensitet si deri tani, siç ka qenë në vitet e fundit”, tha Simiq.
Kryeministrja e Serbisë do të hyjë me letërnjoftim në territorin e Kosovës, teksa Simiq thotë se identifikimi do të jetë i njëjtë “sikur të ishte në ndonjë pjesë tjetër të Serbisë”.
Simiq tha se kryeministri Albin Kurti nuk po mundet ta fshehë zemërimin e tij për gjithçka që kryesia shtetërore e Serbisë po bën për të stabilizuar situatën në terren, raporton KosovoOnline, transmeton Klankosova.tv.
“Kurti pret që këtu të ketë tension, probleme, kaos, e gjitha kjo falë lëvizjeve të tij të njëanshme. Ne jemi të interesuar për paqen dhe ky është mesazhi kryesor që populli serb pret të dëgjojë nga kryeministrja Bërnabiq, si dhe që të ketë investim që do të mundësojë jetë më të mirë për qytetarët, më shumë vende pune, qëndrim dhe mbijetesë të serbëve në këto zona”, theksoi nënkryetari i Listës Serbe.
Simiq tha se nuk ka moment më të mirë për këtë vizitë dhe se përfaqësuesit e Listës Serbe dhe i gjithë populli serb i janë mirënjohës kryeministres që erdhi në një moment kaq delikat për të mbështetur popullin dhe për t’i ndihmuar të gjithë të kalojnë periudhën e ardhshme, kryesisht për shkak të negociatave të ardhshme për targat.
“Përderisa qëllimi i Prishtinës është të shkaktojë tension dhe destabilitet, fokusi kryesor i serbëve është se si ta ruajnë paqen dhe sigurinë e qytetarëve tanë”.
