Anësori kosovar

Shaqiri nuk bind Liverpoolin, e ardhmja larg “Anfield”

Xherdan Shaqiri nuk i ka arritur pritshmëritë në “Anfield Road” këtë sezon dhe klubi anglez mund ta shesë atë gjatë verës.

Të paktën kështu shkruan tabloidi britanik “Daily Mail”, sipas të cilit, trajneri Jurgen Klopp është i vendosur të kërkojë opsione tjera për ta freskuar ekipin.

Futbollisti kosovar u ishte bashkuar “The Reds” nga Stoke City verën e kaluar për një marrëveshje prej afro 15 milionë eurosh, por ka dështuar të impresionojë në “Anfield Road”, duke i realizuar 6 gola dhe duke dhuruar 5 asistime në 30 ndeshje në të gjitha kompeticionet, shkruan tabloidi britanik.

Por Shaqirit nuk i janë dhënë shumë shanse për të shkëlqyer te Liverpooli pasi përpara kishte konkurrentë të fortë si Mohamed Salah, Sadio Mane e Roberto Firmino.

Dhe tash “Daily Mail” shkruan se 27 vjeçari mund t’i bëjë valixhet gati dhe të largohet pas përfundimit të sezonit.

Shaqiri ka kontratë edhe katër vjet me Liverpoolin, por palët mund të ndahen pas vetëm një viti bashkëpunimi.