Vendimi

Serbisë zyrtarisht sapo iu hap porta e ripushtimit ekonomik të Kosovës. S’ka as reciprocitet të plotë

Ministrja në detyrë e Ekonomisë, Rozeta Hajdari ka njoftuar se vendimi për zbatimin e reciprocitetit me Serbinë është marrë me shumicën e votave në qeveri.

Hajdari thotë se për këtë vendim është njoftuar nga shefi i Kabinetit të Kryeministrit, Luan Dalipi.

“Me vendimin e sotëm janë marrë dy masa thelbësore: Kryesorja është që marrëdhëniet tregtare me Serbinë do të jenë në pajtim me Kushtetutën e Kosovës dhe legjislacionin ne fuqi…Masa e dytë ka të bëjë me certifikatat veterinare për produktet ushqimore dhe jo ushqimore me prejardhje shtazore në kufi”, tha ajo në Rtv Dukagjini.

Ajo ka përmendur një barrierë tregtare që Serbia u ka bërë verërave të Kosovës, ku të njëjtat kanë mundur të eksportohen në budrumet e Serbisë, por nuk kanë  mundur të dalin në Serbi me shishe dhe etiketa “Made in Kosova”.

Ministrja e Ekonomisë thotë se qeveria Kurti mbajti premtimin qeverisës duke zëvendësuar tarifën 100% me reciprocitet.

Edhe kryeministri në detyrë i Kosovës, Albin Kurti në konferencën për medie gjatë ditës njoftoi se nga nesër do të fillojë të aplikohet masa e reciprociotetit ndaj produketeve të Serbisë.

Të kujtojmë se Kurti gjatë fushatës zgjedhore për zgjedhjet e 6 tetorit dhe pas zgjedhjeve kishte thënë se Serbisë do t’i vendoset reciprocitet i plotë ekonomik, tregtar dhe politik.

Mirëpo me vendimin e sontëm, Serbisë nuk po i vendoset ky reciprocitet, në fakt Kurti sonte tha se ky reciprocitet do të jetë gradual, pra as i plotë ekonomik. /Ballkani.info/