Zëvendëskryeministri Driton  Selamanj ka reaguar pas plagosjes me armë zjarri të një zyrtari policor në lagjen Veternik në Prishtinë.

Sipas tij sulmi me armë zjarri dhe cenimi i integritetit fizik të policit në detyrë, gjatë parandalimit të krimit, është i papranueshëm dhe i dënueshëm.

“Sulmi me armë zjarri dhe cenimi i integritetit fizik të policit në detyrë,gjatë parandalimit të krimit, është i papranueshëm dhe i dënueshëm. Zyrtarit policor i dëshiroj shërim të shpejtë dhe si anëtar i Kabinetit të Qeverisë së Republikës së Kosovës zotohem për mbështetje të pa rezervë Policisë së Kosovës në zbatimin e rendit dhe ligjit”, ka shkruar ai në një postim në “Facebook”.

Në ndërkohë në orët e para të mëngjesit hajnat kanë tentuar që të vjedhin para në një bankomat në këtë lagje.

Lajmin e kanë bërë të ditur nga Policia e Kosovës në rajonin e Prishtinës.

Policia bëri me dije se rasti ka ndodhur rreth orës 5 e 30 minuta.

Sipas njoftimit, policia ka dalë menjëherë në vendin e ngjarjes, ku edhe ka pasur të shtëna me armë zjarri.

“Rreth orës 05:30 është pranuar informata për një tentativë grabitjeje të një bankomati në një qendër tregtare në lagjen Veterniku në Prishtinë.

Me të marrë informatën, policia me shpejtësi ka dalë në vendin e ngjarjes dhe të dyshuarit, për t’iu shmangur kapjes nga policia, kanë shtënë me armë zjarri në drejtim të zyrtarëve policorë dhe për pasojë  kanë plagosur një zyrtar policor, i cili menjëherë është dërguar në QKUK për trajtimin e nevojshëm mjekësor.