Mediat kanë raportuar sot se deputeti i Lidhjes Demokratike të Kosovës, Agim Veliu, do të jetë pjesë e listës për deputetë nga radhët e Aleancës për Ardhmërinë e Kosovës në zgjedhjet e 9 shkurtit.
Mirëpo, ka qenë vet Veliu që e ka demantuar këtë lajm përmes një postimi në Facebook.
Postimi i plotë:
Një lajm i rremë i publikuar nga Indeksonline, se kinse unë do të jem në listën e kandidatëve për deputet të AAK-së shpejt është shpërndarë nëpër portale.
Një lajm i tillë në kohë fushate, përveç që është i rremë, më bën të dyshoj se është i porositur nga ata që duan ta atakojnë personalitetin tim dhe Lidhjen Demokratike të Kosovës.
Por, për të gjithë ata që pretendojnë që në çfarëdo forme të më shohin jashtë LDK-së, e kam një porosi: askush dhe asnjë forcë nuk mund ta largojë Agim Veliun nga LDK-ja.
Nëse ju mungojnë klikimet dhe ju duhet të bëni lajme sensacionale, merruni me ata që i ndërrojnë partitë më shpesh se kostumet!
Zoti e bekoftë Lidhjen Demokratike të Kosovës







