Raporti i Parlamentit Evropian: Njerëzit e Albin Kurtit shpërndanë ‘fake news’ se Vjosa Osmani është agjente ruse!

Një studim-raport mbi rolin e lajmeve të rreme në Ballkanin Perëndimor, i prezantuar në Parlamentin Evropian (PE) thotë se fenomeni i dezinformimit në Kosovë ka pasur implikime të drejtpërdrejta politike që shkaktuan edhe rënien e qeverisë së Albin Kurtit.

Në këtë raport të publikuar sot thuhet po ashtu se njerëzit e kreut të Vetëvendosjes, Albin Kurtit, kanë shpërndarë lajme të rreme për ushtruesen e detyrës së presidentit, Vjosa Osmanit.

Në këtë raport thuhet se njerëzit e afërt me ish-kryeministrin Kurti, kanë manipuluar mediat shtetërore për të shpërndarë lajme të rreme kinse Vjosa Osmani është agjente ruse.

Një gjë e tillë në raport thuhet se është e rrezikshme për një vend si Kosova që ka konsensus të plotë pro-NATO-s.

“Pasiguria gjeopolitike krijon mundësi që ‘aktorët’ vendas të përhapin dezinformim poashtu. Kosova është një rast kyç në këtë drejtim. Për shembull, ‘aktorët’ vendas të përfshirë në qeverinë e Kryeministrit Albin Kurti besohet se kanë manipuluar mediat shtetërore për të shpërndarë lajme të rreme duke akuzuar Vjosa Osmanin, një kandidate e opozitës për kryeministre në zgjedhjet parlamentare 2019, si agjente ruse – një akuzë e dëmshme në një vend me një konsensus të fortë pro-NATO-s. Në të vërtetë, politikanët e zakonshëm në Kosovë kirjojnë përshtypje të gabuara në publik si rezultat i gazetarëve që shpërndajnë dezinformata”, thuhet në këtë raport.

Sipas pretendimeve në këtë dokument, të cilat janë bërë sipas analizës së mediave sociale, si mediat ashtu edhe politikanët u përfshin në këtë fushatë, të cilën studimi i identifikon si “kanale kryesore të dezinformimit në Kosovë”.