Rama mohon akuzat e Pecit: Mungojnë matjet gjeodezike, në transformimin e Kryeqytetit kërkohet një seriozitet më i madh

Kryetari i Prishtinës, Përparim Rama, iu ka përgjigjur akuzave të ministrit të Bujqësisë, Pylltarisë dhe Zhvillimit Rural, Faton Peci, se qëllimshëm ka bllokuar procedurat për ndërtimin e objektit të ministrisë që ai drejton.

Gjatë ditës së sotme, Peci ka thënë se qytetarët duhet ta dinë se kreu i Prishtinës ka bllokuar çdo procedurë për ndërtimin e objektit të kësaj ministrie.

Në një prononcim për EO, Rama thekson se në këtë proces mungojnë matjet gjeodezike për t’u pajisur me leje ndërtimi.

“Ne faktikisht po them në procesin e transformimit të Kryeqytetit jemi duke kërkuar po ashtu edhe një seriozitet më të madh në aspektit profesional. Pra neve na duhet i gjithë dokumentacioni më pas parasysh më sa e kuptova unë prej Drejtorisë së Urbanizmit mungojnë matjet gjeodezike të cilat janë më së të nevojshme në procesin për me e marrë edhe lejen”, u shpreh Rama, teksa mohon akuzat se këto vonesa po bëhen për shkaqe politike.

“… pra nuk ka këtu asnjë aspekt politik apo negativ apo çka do qoftë, mirëpo është aspekt profesional prandaj i lutem edhe ministrit që të ketë një qasje më profesionale në këtë aspekt me ekipin e tij dhe normal nuk do ketë asnjë problem”, deklaroi Rama.