Rahoveci shpallet Komuna e parë në Grantin e Performancës Komunale – përfiton mbi një milion euro

Komuna e Rahovecit është shpallur sot e para në Kosovë në Grantin e Performancës Komunale, duke përfituar 1 milion e 148 mijë e 890 euro.

Kryetari i Rahovecit, Smajl Latifi, ka njoftuar qytetarët për këtë lajm. Ai është shprehur i gëzuar dhe ka thënë se ky fond i fituar, do të ndikojë pozitivisht në ekonominë lokale të Rahovecit.

“Komuna e Rahovecit është gjithmonë e angazhuar për qeverisje të mirë dhe në shërbim të qytetarëve. Vazhdimisht po rritet efikasiteti dhe performanca, sikurse transparenca dhe llogaridhënia. Vlerësimi i punës sonë, si në rastin e sotshëm, është motivues për të punuar edhe më shumë dhe për t’i shërbyer komunës sonë edhe më mirë”, ka shkruar Kryetari Latifi.

Njoftimi i plotë:

KOMUNA E RAHOVECIT, E PARA NË KOSOVË NË GRANTIN PËR PERFORMANCË KOMUNALE – PËRFITON 1,148,890.70 €.

Bashkëqytetarë të dashur të Rahovecit,

Me gëzim ju njoftoj që Komuna e Rahovecit është shpallur sot e para në nivel shteti në Grantin e Performancës Komunale për vitin 2020, nga Ministria e Pushtetit Lokal dhe Organizata DEMOS, duke arritur 64 pikë në vlerësim, më shumë se çdo komunë tjetër e Kosovës.

Me këtë rast, Komuna dhe qytetarët e Rahovecit përfitojnë gjithsej 1,148,890.70 €, mjete që do të shfrytëzohen për investime kapitale në sektorë dhe projekte që rrisin mirëqenien dhe i kontribuojnë zhvillimit të ekonomisë sonë lokale. Padyshim, për ekonominë dhe komunën tonë, kjo është një shumë mjaft e madhe që do të ndikojë dhe ndjehet pozitivisht nga secili prej jush.

Komuna e Rahovecit është gjithmonë e angazhuar për qeverisje të mirë dhe në shërbim të qytetarëve. Vazhdimisht po rritet efikasiteti dhe performanca, sikurse transparenca dhe llogaridhënia. Vlerësimi i punës sonë, si në rastin e sotshëm, është motivues për të punuar edhe më shumë dhe për t’i shërbyer komunës sonë edhe më mirë.

Falënderoj komisionin vlerësues të Grantit të Performancës Komunale për vlerësimin korrekt, Ministrinë e Pushtetit Lokal dhe Organizatën Demos, Ambasadën Suedeze dhe Ambasadën Norvegjeze në Kosovë, si dhe Bashkimin Evropian, për organizimin dhe ndarjen e fondeve dhe për alokimin e një pjese të buxhetit në kuadër të marrëveshjes së IPA-s me Qeverinë e Kosovës.

Dëshira jonë për të punuar mirë dhe mbarë për Rahovecin po bëhet gjithnjë e më këmbëngulëse. Së bashku po prekim rezultate të cilat Rahoveci nuk i ka prekur asnjëherë. Kjo nuk mund të shpjegohet ndryshe, përveçse me përgjegjësinë dhe etikën e thellë të secilit zyrtar e punëtor të administratës, për t’i shërbyer komunës sonë me nder dhe profesionalizëm.

Faleminderit për angazhimin dhe punën e përkushtuar të secilit anëtar të Grupit Punues për Performancë, për Koordinatoren e këtij grupi, znj. Bjondina Ramaj, për ekipin tim politik dhe gjithë bashkëpunëtorët si dhe zyrtarë/et e shërbimit civil në Komunë.

Mirënjohje secilit prej jush dhe urime të gjithëve!