Qalaj: Nga pensionimi i parakohshëm mund të përfitojnë 1500 policë
Ish-drejtori i Policisë së Kosovës, deputet i PDK-së, Rashit Qalaj ka dhënë detaje rreth nismës ligjore për pensionimin e parakohshëm të policëve të Kosovës.
Qalaj ka paralajmëruar se projektligji do të jetë gati në vjeshtë dhe ai pret miratimin në Kuvendin e Kosovës.
Deputeti Qalaj është shprehur se ka mbështetje edhe të pozitës për nismën e tij ligjore, për miratimin e një ligji për pensionimin e parakohshëm në radhët e Policisë së Kosovës.
Sipas tij, kostoja financiare nuk duhet të jetë pengesë, sepse kur është në pyetje siguria e vendit, shteti duhet të jetë i gatshëm të bëjë zgjidhje.
“Rreth 1500 pjesëtarë të Policisë mund të përfitojnë nëse miratohet ky ligj, ndërsa janë rreth 500 që kanë probleme shëndetësore, trauma dhe e ushtrojnë me vështirësi detyrën e policit”, ka thënë Qalaj në RTK.
Qalaj ka folur edhe për sfidat me të cilat po ballafaqohet policia kosovare, duke nisur nga mungesa e uniformave, këpucëve e deri te mungesa e sigurimit shëndetësor. Ai i ka bërë thirrje qeverisë të rrisë pagat e policëve, të cilët janë prekur nga kriza e thellë ekonomike.
