Sot në orën 16:30 do të mbahet protesta e studentëve shqiptarë në Maqedoninë e Veriut
Një pjesë e studentëve që janë nisur për në Shkup janë bllokuar në kufi me Maqedoninë e Veriut. Institucionet e Kosovës janë njoftuar nga vendi fqinj që ka rënie të sistemit të regjistrimit.
Mevlan Ademi, kryetari i protestës studentore, ka bërë thirrje që të lejohet hyrja e shqiptarëve në kufi. Ndryshe ai paralajmëron se nëse nuk do të ketë ndërhyrje të shpejtë, do duhet që studentët të marshojnë drejt Ministrisë së Punëve të Brendshme
“Lëshoni menjëherë vëllezërit tanë shqiptarë të ndaluar në pikën kufitare!
Kërkojmë veprim të menjëhershëm dhe lejim të hyrjes së tyre pa vonesë.
Nëse nuk ka ndërhyrje të shpejtë dhe zgjidhje urgjente, ne do të jemi të detyruar të marshojmë drejt Ministrisë së Punëve të Brendshme”, shkruan studenti.
Policia e Maqedonisë së Veriut e ka ndalur krejtësisht qarkullimin e personave dhe automjeteve në kufirin me Kosovën.
Qendra Kombëtare për Menaxhim Kufitar të Kosovës thotë se “sistemi i regjistrimit të hyrje/daljeve në RMV ka rënë”, duke shkaktuar “kolona të gjata”.
“Ju njoftojmë, se prej orës 13:40 sipas njoftimit nga zyrtarët e Policisës së RMV, sistemi i regjistrimit të hyrje/daljeve në RMV ka rënë dhe me këtë rast Policia e RMV kanë ndalur krejt qarkullimin, hyrje /daljet e personave,veturave dhe autobusëve. Për momentin janë duke u krijuar kolona të gjata për shkak të ndërprerjes së qarkullimit. Ju rekomandojmë që të shfrytëzoni PKK Stançiq-Bellanovc apo PKK Glloboqicë. Për çdo ndryshim do t’u njoftojmë me kohë”, thuhet në njoftim.
QKMK kërkon që për më shumë informata, të kontaktoni me ta në numrat: 045198000, 045198606 dhe pa pagesë në 080050095.







