Policia i gjen kanabis sativa në shtëpi kryeplakut

Kryetari i fshatit Barç, në Çorovodë është shpallur në kërkim pasi policia i ka gjetur në banesën e tij, 15 kg kanabis sativa si dhe një armë gjahu.

Bëhet fjalë për 42-vjeçarin me iniciale D. H., ku pasi policia ushtroi kontroll në banesën dhe magazinën e tij, u gjetën dhe sekuestruan në cilësinë e provës materiale 15 kg lëndë e dyshuar narkotike Cannabis Sativa dhe një armë gjahu teke.

Kryeplaku i një fshati e ka të përcaktuar në detyrat e tij funksionale që të raportojë nëse në territorin që mbulon ka kultivim kanabis, por në rastin konkret ka qenë vetë kryeplaku që ka kultivuar kanabis si dhe e ka mbajtur në shtëpi.

Kryeplaku do të akuzohet për tre vepra penale, “Prodhimi dhe shitja e lëndëve narkotike”, “Mbajtja pa leje e armëve të gjahut”, “Shpërdorim detyre” dhe “Kultivim i bimëve narkotike”.

Njoftimi i policisë:

Vijon puna për goditjen e veprimtarisë kriminale në fushën e narkotikëve.

Sekuestrohen 15 kg lëndë narkotike Cannabis Sativa dhe një armë gjahu.

Shpallet në kërkim kryetari i fshatit, poseduesi i lëndës narkotike.

Nga shërbimet e Komisariatit të Policisë Skrapar, në vijim të punës për goditjen e veprimtarisë kriminale në fushën e narkotikëve dhe në bazë të informacioneve të marra në rrugë operative se shtetasi D. H. posedonte lëndë narkotike, u ushtrua kontroll në banesën dhe magazinën e tij, ku u gjetën dhe sekuestruan në cilësinë e provës materiale 15 kg lëndë e dyshuar narkotike Cannabis Sativa dhe një armë gjahu teke.

Në përfundim të veprimeve hetimore u bë shpallja në kërkim e shtetasit D. H., 42 vjeç, kryetar i fshatit Barç, Çorovodë.

Materialet iu referuan Prokurorisë pranë Gjykatës së Shkallës Parë Shkodër, për veprat penale “Prodhimi dhe shitja e lëndëve narkotike”, “Mbajtja pa leje e armëve të gjahut”, “Shpërdorim detyre” dhe “Kultivim i bimëve narkotike”.