“Po vrasin njerëz”, Bideni kritikon Facebookun dhe mediat e tjera sociale
Presidenti i Shteteve të Bashkuara të Amerikës, Joe Biden, kritikoi platformat e mediave sociale, si Facebook, për përhapjen e dezinformatave në lidhje me COVID-19 dhe vaksinat, pasi administrata e tij i ka fajësuar ata për ngecjen e niveleve të vaksinave në SHBA.
“Ata po vrasin njerëz”, ka thënë Biden kur u pyet se cili ishte mesazhi i tij për platformat e mediave sociale si Facebook për përhapjen e pretendimeve të rreme dhe mashtruese në lidhje me virusin dhe sigurinë e vaksinave që e parandalojnë atë.
“E vetmja pandemi që kemi është midis të pavaksinuarve, dhe kjo është – ata po vrasin njerëz”, vazhdoi ai.
Facebook iu kundërpërgjigj presidentit amerikan, duke e akuzuar se po flet pa fakte.
“Ne nuk do të shpërqendrohemi nga akuzat të cilat nuk mbështeten nga faktet. Fakti është se më shumë se 2 miliardë njerëz kanë parë informacione autoritare në lidhje me COVID-19 dhe vaksinat në Facebook, e cila është më shumë se çdo vend tjetër në internet. Më shumë se 3.3 milionë amerikanë kanë përdorur gjithashtu mjetin tonë të gjetjes së vaksinave për të gjetur se ku dhe si të merrni një vaksinë. Faktet tregojnë se Facebooku po ndihmon në shpëtimin e jetës”, ka thënë një zëdhënës i kompanisë.
Kirurgu i përgjithshëm amerikan Vivek Murthy të enjten ngriti alarmin rreth valës në rritje të dezinformimit në lidhje me COVID-19 dhe vaksinat përkatëse që kërcënojnë përpjekjet e administratës Biden për të shuar pandeminë.
Sekretari i shtypit i Shtëpisë së Bardhë, Jen Psaki, të enjten gjithashtu ka thënë se Facebooku nuk po bënte sa duhet për të ndaluar përhapjen e informacionit të rremë në lidhje me koronavirusin.
