Unaza e Jashtme e kryeqytetit do ta zgjidhte problemin e trafikut të dendur në kryeqytet, sipas kryetarit Përparim Rama, i cili s’mundi ta realizonte atë vetëm për shkakun që qeveria e Albin Kurtit nuk po ia mundësonte marrjen e një kredie në BERZH. Tani, ironikisht, ky plan i kandidatit të LDK-së, po konsiderohet “domosdoshmëri” dhe prioriteti “numër një” i Hajrulla Çekut, kandidatit të LVV-së për kryetar të Prishtinës.

Ndërtimi i unazës së jashtme në Prishtinë do ta çlironte trafikun në kryeqytet, sipas kryetarit Përparim Rama, i cili po garon me LDK-në për një tjetër mandat.

Ky ishte premtimi kryesor në fushatën zgjedhore të para katër vjetësh, i arkitektit që erdhi nga Londra për t’i zgjidhur disa probleme në kryeqendrën e Kosovës.

“Projekti i parë i yni që e kemi kryer, e kemi përfundu, dhe ka qenë i gatshëm që të shkojë përpara, është Unaza e Jashtme. Është bllokada e kësaj qeverisjeje e cila e ka pamundësu”, thotë Rama tash, në një intervistë Pressing në T7 më 22 shtator.