Pasi tha se edhe zogjtë i dinë raportet e saj me Kurtin, Vjosa Osmani bojktoi edhe mbledhjen e Grupit Parlamentar të LDK-së
Shefi i Grupit Parlamentar i Lidhjes Demokratike të Kosovës, Arben Gashi tha se kanë diskutuar me mandatarin për kryeministër, Avdullah Hoti për programin qeverisës dhe planin e punës së Qeverisë Hoti, ndërsa tha po ashtu se java e ardhshme e gjen Kosovën me qeveri të re.
I pyetur nëse beson se muaji i ardhshëm do të gjej Kosovën me një qeveri të re sipas Gashit, një gjë e tillë do të ndodh javën e ardhshme.
“Jo muajin e ardhshëm, por java e ardhshme”, tha Gashi.
Ai tha se programi qeverisës do të jetë i gatshëm brenda dy ditësh edhe për publikun dhe tha se njëra nga prioritetet e Qeverisë Hoti është edhe dialogu për të cilën tha se janë të gatshëm për këtë.
“Në aspektin e dialogut, programi qeverisës përmban orientimin strategjik të konfirmuar në Këshillin Strategjik të LDK-së, vitin e kaluar. Pra janë shtylla të konfirmuara në vitin 2019. Sa i përket vendimeve konkrete është edhe aktgjykimi i Gjykatës Kushtetuese”, tha Gashi.
Gashi shtoi se në momentin që publikohet vendimi i Gjykatës Kushtetuese ai do të riaktivizoj kërkesën për seancë të jashtëzakonshme.
“Në momentin që të dal vendimi i gjykatës Kushtetuese unë si shef i Grupit Parlamentar do të riaktivizoj kërkesën për seancë të jashtëzakonshme dhe do të caktohet data dhe ora, dhe që kjo nuk do të merr më shumë se 24 orë”, tha Gashi, raporton Ballkani.info.
Gashi tha se janë të ftuar të gjithë deputetët, megjithëse kryetarja e Kuvendit, Vjosa Osmani e cila vjen nga kjo parti nuk ka qenë e pranishme në këtë takim.
Kjo nuk është hera e parë që Vjosa Osmani bojkton takimet e organeve më të lartë të LDK-së, por ka pasur raste kur ajo as nuk është ftuar. Ftohja e Vjosa Osmanit me LDK-në ka nisur në momentin e rrëzimit të Qeverisë Kurti, ku aso kohë ajo pati dalë kundër.
Më vonë, saktësisht ditë më parë, Osmani në një deklarim për mediat tha se “edhe zogjtë e dinë se ajo ka bashkëpunim dhe qëndrime të njëjta me kryeministrin Kurtin”.
Ndaj kësaj deklarate para dy ditësh ka reaguar Haki Rugova, nënkryetar i LDK-së.
“Zonja Osmani ka thënë se edhe zogjtë e mali e dinë për raportet e saj me Albin Kurtin dhe u kry puna, ajo nuk është më në LDK dhe nuk ka asnjë standard në botë që ekziston, ku mund të lejohet që dikush mund ta trajatojë atë në këtë formë, ekziston një logjikë, dikujt mundesh me i dhanë diqka, por me i marrë me zor nuk mundesh”, pati thënë Rugova. /Ballkani.info/
