Xhudistja kosovare Nora Gjakova ka arritur ta zë një vend në çerekfinale të garës në kategorinë deri në 57 kilogramë në Grand Slamin e Parisit.
Nora Gjakova u tregua shumë e fortë për xhudistin franceze Priscilla Gneto, e cila kishte probleme me gisht të këmbës gjatë përballjes, dhe e mposhti atë me ippon në Paris, për t’i shkuar kështu një hap më afër medaljes së artë.
Kosovarja e mposhti xhudistin nga Azerbajxhani, Alexandra-Larisa Florian në rundin e dytë, ndërsa rundin e parë e kaloi pa luftë.
Kosova po përfaqësohet me tri garuese në turneun e xhudos, “Paris Grand Slam 2020”, njëra prej të cilave është edhe Laura Fazliu. Edhe pse pritej që pjesë e këtij turneu të ishte edhe Majlinda Kelmendi, trajneri Driton Kuka e tërhoqi atë në momentet e fundit.
Edhe Distria Krasniqi i ka shkuar një hap më afër medaljes së artë në Grand Slamin e Parisit, pasi që fitoi në rundin e tretë për ta zënë një vend në çerekfinale të kategorisë deri në 52 kilogramë.
Ndërsa Laura Fazliu e ka mbyllur në rundin e dytë rrugëtimin e saj në kategorinë deri në 63 kilogramë në Grand Slamit e Parisit, pasi që u mposht me ippon në rundin e dytë nga koreania Hee Ju Han.







