SBASHK

Një orë para afatit të fundit, SBASHK paralajmëron veprimet nëse nuk ekzekutohen pagat

Sindikata e Bashkuar e Arsimit dhe Shkencës është në pritje edhe sot për ekzekutimin e pagave për mësimdhënësit. Ata thonë se sot është afati i fundit në të cilën qeveria duhet të reflektoje dhe të ekzekutohen pagat në të kundërtën, SBASHK do të mblidhet pas orës 16:00 në një takim urgjent me kryetarët e komunave.

Ahmet Pllana, kryetar i SBAShK-ut për Komunën e Prishtinës, dhe njëherit anëtar i Këshillit drejtues në SBAShK, ka thënë se është e padrejtë se si administratës i janë ekzekutuar pagat, pasi edhe të njëjtit kanë qenë në greve.

“Ne kemi prit që sot të ekzekutohen pagat nga qeveria, sepse qeveria ka bërë ndaljen e pagave të mësimdhënësve që ligjërisht nuk është e drejtë. Më e keqja është se në grevë kanë qenë edhe administratat, por kryesisht administrata i kanë marrë pagat, ndërsa mësimdhënësve nuk ju kanë ekzekutuar pagat, dhe sot është data e fundit që qeveria duhet të reflektoje dhe t’i ekzekutojë pagat për mësimdhënësit”, theksoi ai.

Pllana tha se në vend se qeveria të falënderojë, SBAShK-u, mësimdhënësit, nxënësit, dhe t’i urojë një vit të mbarë, kryeministri bëri presion duke u’a ndalur pagat.

Ai tha se një pjesë e madhe e mësimdhënësve janë në kredi dhe në këtë formë ata janë duke u ndëshkuar. Ai ka shtuar se nuk janë duke kërkuar avancë qeverisë, porse kanë kërkuar 100 euro për shkak të inflacionit.

“Dihet se pjesa dërrmuese e mësimdhënësve janë në kredi, bankat nuk pyesin dhe i ndalin kamatat, në këtë formë ndëshkohen prapë mësimdhënësit. Më e keqja është se ministrja e arsimit, Arbërie Nagavci thotë se duhet t’i jepen avancë apo huazim mësimdhënësve për këtë muaj, dmth. t’i detyrojë të hyjnë borxh edhe njëherë mësimdhënësit, sepse avanci është për t’i kthyer paratë dhe ne s’kemi kërkuar huazim, ne kemi kërkuar 100 euro për shkak të inflacionit dhe këtë nuk arriti ta bëjë qeveria, prandaj prapë fillon me presione duke tensionuar edhe më shumë gjendjen, për arsyeje se paga është për jetesë të mësimdhënësve”, tha ai.

Më tej, ai tha se dialogu social nuk mbahet kështu me injorime dhe me sharje. Ai ka akuzuar qeverinë për mos plotësimin e kushteve për të filluar mësimi. Sipas tij disa mësimdhënës në mungesë të ditarit nuk kanë pasur ku ta shkruajnë orën.

Kryetari i SBASHK-ut për Komunën e Prishtinës, Ahmet Pllana

“Kjo qeveri nuk ka kuptim për neve se si është duke vepruar, është disi si hakmarrje ndaj mësimdhënësve, apo e ka qëllimin ndaj SBAShK-ut, që çdo herë ka qenë, për arsyeje se nuk ka pasur dialog. Qeveria nuk ka qenë gati, edhe nëse nuk do të ishim në grevë për fillimin e viti shkollor, për arsye se mungojnë tekstet shkollore, për klasat e pesta, mungojnë ditarët, në të cilën mësimdhënësit orën e parë ku ka filluar viti shkollor nuk kanë pasur ku ta shkruajnë orën. Prandaj, këto është dashur t’i plotësojë qeveria dhe të mos hakmerret ndaj mësimdhënësve. Në vend se të na përgëzojë qeveria, po fillon prapë me fyerje dhe tensione të ndryshme”, ka shtuar Pllana.

Anëtari i SBAShK-ut është shprehur kundër zëvendësimit të orëve të humbura. Sipas tij fëmijëve nuk duhet humbur pushimet.

“Ministria e ka publikuar kalendarin jo në fillim por pasi ka filluar mësimi, dhe tash ka ndryshuar kalendari. Nuk ju hupet fëmijëve pushimi dimëror, pranveror, nuk ju zgjatet mësimdhënësve viti shkollor, këtë e ka bërë qeveria vet, dmth për shkak se ka pasur kohë që qeveria të reflektojë dhe të mos i ndëshkojë mësimdhënësit me anë të pagave. Dhashë zoti që qeveria të kthjellet dhe i ekzekuton pagat për mësimdhënësit sepse kjo është kundër ligjore. Në qoftë se qeveria nuk bënë ekzekutimin e pagave, sot do të mblidhet këshilli drejtues dhe të vendosin për hapat e mëtutjeshëm”, tha ai.

Ndërsa Ministri i Financave Punës dhe Transfereve, Hekuran Murati, ka deklaruar sot se sa i përket pagave për grevistët do të zbatojnë ligjin përkatës.