Nënkryetari LDK-së kritikon Qeverinë për dialogun me Serbinë, del me një propozim
Nënkryetari i Lidhjes Demokratike të Kosovës, Lutfi Haziri thotë se Qeveria Kurti e ka filluar me hezitime qasjen ndaj dialogut me Serbinë.
Sipas tij, Kosova duhet ta shfrytëzojë kohën e pritjes së zgjedhjeve në Serbi për aktivizimin e dialogut të brendshëm, të partive parlamentare dhe jashtë parlamentare, duke përfshirë edhe shoqërinë civile në mënyrë që Kosova të përgatitet sa më mirë.
Përmes një shkrimi në Facebook, Haziri tha se Kosova është në një proces i cili kërkon përkushtim të madh dhe sipas tij, rreziku më i madh është mospërfshirja me seriozitet dhe lidership në këtë proces të dialogut.
“Jemi në një proces i cili kërkon përkushtim të madh dhe rreziku më i madh është që mos përfshirja me seriozitet dhe lidership në këtë proces të dialogut, sepse frika më e madhe është nga krizat rajonale dhe ato mund të kenë impakt shumë të madh në ngadalësim dhe ngulfatje të këtij procesi, i cili për ne është jetik, për shkak se integrimet euro-atlantike janë drejtim i vetëm për të cilin Kosova e sheh mundësinë politike që ta përfundojë shtet-ndërtimin për të qenë i barabartë me shtete tjera sovrane”, shkroi Haziri.
Ai tha se shumicë parlamentare e ka mbështetjen e opozitës sa i përket çështjes së dialogut, por sipas tij, kjo mbështetje nuk është pafund.
“Nuk mund të themi që e mbështesim hezitimin e mos besimin e tyre. Ne e mbështesim lidershipin e Qeverisë që të jetë këmbëngulëse, e qëndrueshme, kreative dhe të mos e kushtëzojë procesin e dialogut me çështje të cilat janë sekondare”.
Tutje, Haziri tha se duhet të merret seriozisht letra e presidentit amerikan Joe Biden.
“Letra e Presidentit Biden, e konfirmuar nga Sekretari amerikan i shtetit, në Prishtinë duhet të merret seriozisht dhe pala jonë duhet t’i trajtojë seriozisht kërkesat e tyre, sikur që Serbia tashmë e di se marrëveshja përfundimtare është me njohje reciproke.
Por, krizat regjionale që janë prodhuar tash e që janë ndikim indirekt në Ballkanin Perëndimor mund ta rrezikojnë procesin seriozisht. Ne nuk guxojmë në asnjë mënyrë të rrezikohet procesi me këtë mbështetje amerikane dhe me ndërmjetësimin e BE-së që e kemi. Qeveria duhet të tregojë lidership dhe seriozitet, në mënyrë që të zbatojë obligimet që i ka, ta merr përsipër dialogun dhe agjendën, të shtyjë përpara këtë proces dhe, natyrisht, një konsensus sa më gjithëpërfshirës”, tha Haziri.
